火燒埋身 顧自己先 挺梁陣營一盤散沙
七．一又有幾十萬人上街，場火愈燒愈猛，睇嚟會燒到明年政改諮詢，好似曾鈺成話齋，如果到時普選問題仲傾唔埋欄，將更大鑊！
外面殺聲震天，攻到埋身，但挺梁陣營呢邊，卻散過散沙，「齊心」口號已名存實亡，大家各有各玩，講得老土啲，人不為己，天誅地滅，唔想同CY攬埋一齊畀人燒。咁樣落去，政府唔知點捱！
民建聯同工聯會舊年力挺CY上位，以後愈行愈遠，近期擴建堆填區一役更臨陣掉轉槍頭，搞到政府裙拉褲甩，倉皇撤兵，內情係CY以為傾掂棠哥同譚耀宗，政策就可過關，兩個大哥大雖答應力撐，但工聯會高層如嫻姐等知道如果唔反對，日後選舉實死梗，而民記地區人馬亦強烈反彈，同大佬發生拗撬，在巨大壓力下，領導層最後惟有轉軚，決定同政府對着幹。
七．一遊行繼續墟冚，「倒梁」場火將燒到明年政改諮詢，CY陷於捱打，但挺梁陣營各有各玩，顧住自己先，例如被委入行會的葉劉（小圖），近日便對政府彈多過讚，暗踩一腳。
線人指，環顧各挺梁政黨，已冇所謂「保皇派」，遇到民生政策，一定先計算選票得失，如果會失分一定唔撐，甚至比泛民鬧得更兇狠。向來走精面嘅自由黨，更加唔使講，田少擺明車馬準備打直選，最緊要保住黨嘅席位，所以「CY呃個特首嚟做」嘅說話都講得出。田少亦唔怕阿爺責怪，因為佢深知只要贏到議席，就有「扭計」本錢！
至於行政會議成員，雖然跟CY同坐一條船，本應一齊迎風破浪，但召集人林煥光極之錫身，首要保住個「氣節」牌坊，唔會兩脇插刀幫CY，最多溫溫吞吞講幾句持平話，同佢保持安全距離。葉劉更加唔客氣，一有機會就單單打打，暗踩一腳，好似最近佢喺電台批評部分局長做嘢唔妥，主持問係咪應換人，佢話係，但以後改口話自己口快快答錯咗。其實佢在其他場合的確私下講過應撤換幾個局長，訪問並冇講錯。葉劉一直有雄心競選下屆特首，對現政府彈多過讚，可能想表示佢係更佳人選。
嫻姐知道攬CY必冇運行，對工聯會日後選舉不利，所以鬧佢惡過泛民。
最近陳太話林鄭同CY有分歧，其實睇歪咗。林鄭雖然有個性，但EQ比陳太高好多，亦更有謀略，知道CY需要佢穩住政府運作，只要忍一忍，好好合作，到機會來臨，就可更上層樓。再睇遠啲，CY做完呢屆，林鄭可以係接班人選之一，佢從來有此雄心，只不過隱而不露。雖然佢同CY冇內訌，但亦會好執着，唔容易妥協，兩人保持權宜關係，各有盤算。
鬍鬚曾揸住盤數，同樣唔會跟CY支指揮棒做嘢，對重大財政政策緊守原則，獨立行事。阿爺當初搵佢做財政司長，都係想佢咁。
梁營中人講，CY雖然有好多施政理念，但手下班公務員有自己一套規章程序，要推動change阻礙重重，有時㷫到起晒火。最近公務員加薪單嘢，梁營內有意見認為應高過通脹，令中下層公務員happy，可以在政治上攞分，但班官堅持跟機制做，唔想破例，結果搞到下面民怨沸騰。
呢位人士仲指，核心「梁粉」本來不多，近期張震遠、林奮強、鄭國漢、高靜芝等紛紛出事或被攻擊，肯出嚟挺CY嘅「梁粉」更買少見少，冇乜人願意赤膊上陣，避得就避，閃得就閃，甚至有人靜雞雞跳船添！
