經紀減佣 施永青話飲鴆止渴
政府接連打壓樓市下，豪宅市場變得死寂，相比○三年沙士時仲要靜。面對淡市，個別地產經紀只好減佣拉客。好似前排港龍航空創辦人曹光彪孫女曹惠婷，花三億七千萬買幅地皮，經紀都係收半隻佣。
話說曹惠婷買入九龍塘畢架山道二號屋地，佣金應係三百七十萬，但最終經紀都係收咗一百八十五萬。同時，曹惠婷為求減低置業成本，以私人名義購入，咁就唔使支付五千五百幾萬元的買家印花稅。呢啲咁大宗買賣，過去大多以公司名義買入，但今時今日要畀咁多交易稅，買家都寧可用自己名買。
睇見啲經紀搶客大減佣，中原地產創辦人施永青就搖搖頭，話呢種行為係「飲鴆止渴」，損人而不利己。
