居屋叫價八千五百萬

政府打壓樓市，二手市場一潭死水，成交到的價格都比高峰時低半成到一成。喺呢個時候，竟然有個居屋放盤叫價八千五百萬，賣方仲喺個廣告入面話筍盤。

個筍盤係馬鞍山錦豐苑居屋，單位建築面積六百零一呎，實用面積四百三十六呎，倘以廣告索價計，建築呎價十四萬一千四百元，實用呎價更達到廿萬，以呎價比較，仲高過太古司徒拔道樓王Opus成倍，簡直匪夷所思。

睇番同類型單位，最新成交價都係三百二十萬，呢個「筍盤」足足高出廿五倍，可以講係居屋之王。

有人好奇，按廣告所寫嘅電話查詢，負責的小姐原來係區內一間中型行嘅地產代理，佢一聽竟然大笑，即時解釋話係打錯咗，事實呢個只係租盤，月租八千五百元。

錦豐苑居屋叫價八千五百萬，原來係手民之誤。

錦豐苑單位現時成交價一般在三百五十萬水平。