曾鈺成拖住未來太太伍嘉敏出席酒會，顯示好事已近。

上周六葉劉嘅匯賢智庫開三周年生日派對，曾鈺成亦有到來祝賀，當佢步入會場，眾人眼前一亮，只見佢拖住一位美麗女士，貌甚親密，介紹之下，原來呢位女士就係同阿曾拍拖年幾嘅舞蹈教師伍嘉敏。

有好友口痕問阿曾，幾時拉埋天窗呀，佢向來怕醜，在此公開場面更加不知所措，口窒窒支吾以對。不過心水清者已看得出，阿曾拖住女友出席公開場合，擺明將親密關係公開化，睇嚟好事近啦！

本刊記者向阿曾身邊死黨打聽，得知佢老哥確已定咗結婚註冊日期，就係今年十一月二十一日，屆時將會搞大個婚禮，廣宴各路兄弟好友，勢必成為政圈盛事。

呢位死黨話，阿曾戀情今年初曝光後，兩人已萌拉埋天窗之意，只因佢做咗立法會主席，要熟習議會運作，又須應付種種突發事件，工作忙到死，壓力亦好大，所以暫緩婚事以免分心，經與另一半商討後，決定年底至正式行禮。

其實阿曾與伍小姐雖未結婚，關係已同夫婦冇乜分別，新年期間，兩口子便去咗沙巴預度蜜月，溫馨咗幾日，感情更加打風打唔甩。

佢哋原本唔想婚禮咁高調，簡簡單單擺幾圍請死黨同家人食餐飯就算，但民建聯班兄弟異口同聲話唔好，認為以阿曾嘅江湖地位，應該搞得隆隆重重，請晒各方好友，以免有所得失。阿曾最後聽取兄弟意見，決定搞大個婚宴，廣發喜帖，預料屆時必定猛人齊集，出現近年難得一見嘅政壇盛況。

阿曾今年六十二，與原配幾年前離婚，當時佢萬分失落，幸好遇上亦已離婚嘅培僑舊同事伍嘉敏，兩人都曾經滄海，迅速發展感情。自從阿曾有咗第二春，成個人開心晒，平日見佢都春風滿面，愛情魔力真係驚人。

政壇喜事重重，除咗阿曾做新郎哥，因太太移情別戀而極度沮喪嘅涂謹申，大半年前與公關公司阿姐蘇麗芬拍拖，最近亦決定在今年十二月結成夫婦。

線人話，個幾月前民主黨高層曾在西貢遊船河開會，阿涂拖埋蘇麗芬出席，大家傾傾吓就扯到阿涂嘅婚事，眾人齊聲叫佢不如拉埋天窗啦，佢本有此意，借住個勢話：「結就結啦！」事隔一個月，就傳來婚訊。

另一單喜事，係社民連三煞之一「大嚿」陳偉業將於八月嫁女，地點在溫哥華，佢老哥要遠赴加拿大辦喜事，屆時毓民同陶君行等幾個兄弟亦會去飲。由於毓民會去北美開「棟篤笑」騷，兩人將於下周初齊飛溫哥華。

社民連「三煞」之一陳偉業嫁女，升級做外父連個樣都和善咗。

純官大反擊 阿爺藉機出硬招

鄭家純（左）被立法會專責委員會「審」足十小時，對議員偏離主題，將矛頭指向公司管治，甚感不滿。

立法會近年頻頻耍出「特權法」撒手鐧，惡形惡相call人去公審，凌辱謾罵兼亂打棍子，被召人士多數敢怒不敢言，「good」聲吞咗硬忍，但新世界中國主席鄭家純就夠晒「吉士」，入稟法院要求覆核《立法會（權力及特權）條例》有冇違反《基本法》，商界同官場唔少朋友對純官膽敢挫立法會銳氣，都連聲叫好，拍晒手掌。

某商界老友話，以佢所知，純官今次毅然反擊，並非個人行為，而係反映商界對立法會愈來愈過份感到好唔妥，如果再唔做嘢，營商環境必受影響，咁就好大鑊。

老友話，純官兩次被召去立法會，總共被「盤」十粒鐘，佢一直都好合作，不亢不卑回答問題，但就覺得成個聆訊好有問題。首先，立法會召梁展文事件各方證人去問話，本應係研究有冇利益輸送，程序係咪唔妥，但班議員愈問愈離譜，竟然將矛頭轉去批判新世界嘅公司管治，肆意抨擊佢冇負企業責任，而且好似審犯咁，所用言詞帶有誹謗性，大大損害公司形象，其中以長毛同湯家驊最惡死。

此外，立法會嘅專責委員會本來應該在聆訊完畢後，至作出結論，但班友在「盤問」之中，部分人未審完就下判斷，對受審嘅商界人士好唔公平。

老友指出，不少商界及官場中人都覺得，立法會運用「特權法」審人已非為搵出真相，而係要show power，如果繼續畀佢哋坐大，後果不堪設想，純官今次提出司法覆核，可以引起公眾對此反思，實在係好事，希望純官「撐到底」。

呢單官司因涉及《基本法》解釋，如果打落去，最後可能要由「阿爺」定奪。政圈知情人士話，近年立法會不斷玩弄權力遊戲，愈踩愈過界，除咗動不動就亮出「特權法」武器，大搞「獵巫」調查，議員仲任意提出私人草案，擾亂政府施政，令官員窮於應付，「阿爺」看在眼裏，已覺得好唔妥，今次可能一改溫和態度，轉趨強硬，藉此機會制止立法會權力無限膨脹。

世事發展有一定律，就係去到極端必有反彈，立法會班友得勢玩到盡，似乎已迫到政府、商界同「阿爺」大反擊。

今次純官出手，請咗資深大狀排名第一嘅施偉賢上陣，立法會亦嚴陣以待，搵咗行政訴訟專家麥高義應戰，為防有失，會由英國請嚟一名御用大狀幫拖，保守估計律師費要過千萬。

立法會現時有儲備一億四千幾萬，要支持呢筆官司費唔成問題，不過有議員認為呢單官司涉及立法會制度問題，費用應由政府負責。不過官場老友認為咁樣唔啱路，立法會迫到商界反擊，問題由自己引起，理應用自己錢，冇理由用公帑。

湯家驊恃着自己是大狀，對純官「審犯咁審」。

長毛有理冇理狂砌受聆訊的公司，未審就判決佢有罪，擺明玩嘢而非調查真相。