發哥身價中國最強 代言兩年 盛惠四千萬
在大陸做零售，唔少品牌都會搵明星做代言人，花費動輒上千萬。內地人好受呢招，總以為某某大明星推介肯定係好嘢，於是一窩蜂搶購，產品隨時變成名牌。
就好似霸王洗頭水，當年搵成龍做代言人，拍咗一輯廣告後，產品銷量急增，幾乎成為民族品牌，至於後期被報道影響銷量一落千丈，那又是別話。但代言人呢招，真係可以將品牌提升。
成龍當年為霸王拍廣告，確實十分成功，令霸王業務急增。
一言識某位老細，佢隻品牌想搵代言人，但由於產品針對成熟男士，所以唔想搵花o靚，以免影響產品形象同級數。左諗右諗，結果敲定周潤發，事關發哥有型有款，兼夾係少有華人能喺荷李活拍大片，喺神州市場有一定影響力。
但不問由自可，一打探就嚇出火，原來今時今日要搵發哥做代言人，兩年使費盛惠四千萬。老細諗，如果肯定成功就冇所謂，假若有乜差池，真係血本無歸，於是打退堂鼓。
聽行內人講，發哥喺芸芸華人演員中，收費屬最高昂之一，屬天王級別，而且即使有錢，都要揀品牌，真係有錢都未必請得郁。
