鬍鬚曾企硬 唔受CY影響

鬍鬚曾今次做預算，枱底有個政治算盤，計算點派糖，至令多數政黨happy，以免過立法會時撻Q。官場線人講，佢老哥早前分別見過各大政黨人馬，綜合所提意見後發現兩樣嘢：第一，絕大多數政黨都反對現兜兜派錢，只有人民力量要求派一萬；第二，幾乎全部政黨（包括泛民及建制）都提出退稅、津貼電費、免差餉、免收公屋一兩個月租金等。鬍鬚曾計過盤政治數，今次唔派錢都掂，但上述各項「糖果」就唔少得，如果樣樣做足，就算縮少少水，多數政黨都會收貨。

鬍鬚曾話自己生活方式似中產，其實同識食識玩識買嘅時尚中產差好遠，可以話老土兼寒酸。圖中他觀賞品味家居設計，只係出席活動，平日絕少買名牌。但網民仍惡搞他的「中產論」（小圖）。

線人指，政府高層對點用錢，亦有唔同想法，鬍鬚曾又要做一番政治計算。CY同林鄭傾向民粹，有社會主義思維，如果畀兩人主導，用錢肯定更多，鬍鬚曾揸咗幾年數，知道理財原則一破，就好似倒水咁，好難收得返，所以企硬揸緊自己嗰套，唔受兩人影響。連佢身邊人都覺，呢個財爺真係幾硬淨。

鬍鬚曾咁堅持，亦符合阿爺期望，須知當年CY組班，阿爺堅持財爺個位由鬍鬚曾坐，因佢夠穩陣，唔會亂嚟，CY惟有妥協接受，但仍想安插親信波哥做副財爺「目及」住佢，但重組計劃最後觸礁，CY牽制鬍鬚曾嘅圖謀落空。

不過鬍鬚曾亦識做，土地供應及房屋政策留番畀CY主導，扶貧部分亦順住CY同林鄭想法，繼續開喉放水，特別係撥一百五十億畀關愛基金，令林鄭happy。佢老哥在官場浸咗幾十年，當然知道政府內部亦要講妥協藝術。

講開鐵三角關係，鬍鬚曾與CY有潛在矛盾，同林鄭就好啲，因為論資歷，佢一直高過林鄭，近年林鄭同煲呔不和，佢曾經撐過呢位阿姐，兩人一直有偈傾，傳聞嘅明爭暗鬥，有啲誇大咗。