琪翠GPS
近期TVB劇集《心路GPS》係網民熱話,首次拍劇嘅黃翠如(Priscilla)亦係焦點之一,今晚嘅「Paco巨星飯堂」,我就邀請到呢個電視劇嘅新面孔,同埋佢嘅好姊妹梁嘉琪,同我講吓佢哋嘅「心路GPS」。
我特別為兩位靚女,挑選咗位於尖沙咀嘅「南燒北鍋」飯敍,一邊品嘗鮮味火鍋,我哋一邊暢談屬於佢哋嘅銀色旅途。
今晚我同嘉琪(左)、Priscilla(右)去到「南燒北鍋」飯敍,細談二人嘅心路。
Priscilla首次參與TVB劇集拍攝,心情緊張之外,佢感激同劇拍檔們嘅教路。
拍劇夠新鮮
Priscilla同嘉琪都係以娛樂主播身份入行,由有線到無綫,從主播到拍劇,兩位靚女都有唔同嘅想法。啱啱開始拍劇嘅Priscilla,原來曾經喺倫敦修讀戲劇,亦都參演過舞台劇同電影《奪標》,但係講到拍劇,都係加入TVB之後先真正開始。
「拍劇呢一刻對我嚟講,都係較做主持有新鮮感,每個劇都要有好多人出力,好似今次《心路GPS》咁,都係我哋全部人努力嘅成果。我恨咗好耐做演員o架嘞,依家終於有機會,所以我好享受。」
Priscilla喺《心路》同唔少演員合作,佢話喺唔同人身上都學到嘢,「煎Pan(陳展鵬)、司棋姐、麥包都教咗我好多嘢。初時我以為煎Pan好coolo架,但係相處耐咗,我發現佢都係大細路,而且做戲好認真,佢仲同我講,要將自己訓練成為一匹好馬,只要一有機會就可以出賽。」
哈哈哈!師兄嘅教誨,Priscilla話已經記住;至於同嘉琪嘅姊妹情,就有增無減。「嘉琪一向都好叻,我就懵盛盛,第一日埋位,我連啲cam放咩位、幾時影住我都唔知,全部都係嘉琪教識我。」
骨膠原龍躉骨鍋($168)用龍躉骨熬足四小時以上,夠晒火候。
極品牛皇鍋($138)以各種牛肉炮製,啱晒「牛魔王」。
9年姊妹情
嘉琪對好姊妹亦毫無保留,「Priscilla喺做嘢嘅時候係好精靈嘅,但係私底下佢好傻大姐(Priscilla:「哈哈!係呀!」),而且啱啱開工嘅時候,佢又唔熟習,所以一定要幫佢。」
哈哈哈!嘉琪同Priscilla相識已久,感情深厚,今晚我以火鍋同呢對好姊妹相聚,嘉琪話夠晒有緣,原因係:「我哋都好鍾意打邊爐,就算只係得我同Priscilla,我哋都會去打,哈哈!一次我哋同兩個朋友一齊去,佢哋都對我哋連湯都飲埋嘅食法,嚇咗一跳!」
既然講到緣份,Priscilla同嘉琪就一定係「人辦」,Priscilla話:「除咗《心路GPS》做好姊妹,我哋喺未播嘅《師父,明白了》入面,都係飾演姊妹。《心路》入面有情節話我哋一齊敷mask,其實我哋一齊去旅行嘅時候已經試過,所以感覺就好似現實生活咁。」
嘉琪即時有默契地補充:「我哋喺《師父,明白了》飾演嘅姊妹,仲要去偷人嘢,拍嘅時候好好玩。」
Priscilla畀好姊妹嘉琪稱為「傻大姐」,佢照單全收。
嘉琪最愛同Priscilla食火鍋,今晚就為佢哋「度身訂造」一個訪問。
迎接新挑戰
嘉琪與Priscilla並肩作戰之外,佢本身嘅演出都深得網民讚賞,最令人記憶猶新,莫過於佢喺《女拳》入面刺死飾演反派嘅馬國明一幕。「馬明好好,佢會同我講:『你放膽做啦,我會完全配合你。』我就feel到佢對我好有信心自然唔會怯。而且網友嘅反應都係我預期之外嘅,佢哋畀我知道自己嘅努力冇白費。」
哈哈哈!所以我一向都話,凡事用心自然有知音,好似嘉琪咁,演出不斷,喺另一部未播出嘅重頭劇《金枝慾孽(貳)》入面,亦有突破性演出。「我喺《金枝(貳)》嘅角色叫『若葵』,係奸嘅宮女,同伍姑娘(伍詠薇)最多對手戲。有咁嘅演出機會就梗係開心啦,而且仲係重頭劇,同一班演員又合作得開心,更加興奮。」
咁我就祝Priscilla同嘉琪都搵到屬於自己嘅星路!乾!