樓價近見頂 買樓要忍手
過去政府針對樓市走勢，主力着眼在供應，然而增供應的問題是遠水不能救近火，久而久之，市場覺得政府冇料到，於是繼續炒賣。但近半年來，政府漸將遏抑樓市措施由增供應轉到勒需求，去年增加額外印花稅（SSD）及推出買家印花稅（BSD），明顯就係從遏需求着手。
原本勒需求只針對炒家，但上月政府推出嘅措施，大幅提升買樓印花稅一倍，連長線投資者都打壓埋；加上將銀行借貸嘅壓力測試由兩厘升到三厘，好明顯自用人士都受到一定影響。
樓市自從去年十月增加SSD同推BSD後，炒家已經絕迹，市場只餘下長線投資者同用家，今次政府再出招，部分樓市投資者勢將卻步，市場只能單靠用家支撐，購買力肯定大不如前。
政府一見樓市有異動就馬上出招，好明確話畀大家聽，唔會畀樓價升，一升就打。
政府打樓市，成交銳降，地產經紀首當其衝，肯定好快要裁員。
而且，政府呢次在相隔四個月不夠時間再推招，好明顯已帶出一個訊息，樓價只要有些許風吹草動，佢會即時調控；換言之未來樓價一有升勢，政府會馬上行動，更不惜以行政手段去遏抑需求，喺咁情形下，你話樓價點升？當然，可能會有個別單位創新高，但冇成交支撐，即係大部分人唔認同呢個價喇，簡單講就係冇代表性。
不要忘記，政府過去幾年大增土地供應，到一四或一五年，每年單位落成量將會倍增；加上美國經濟正在復甦，明年或後年美國隨時加息，對樓市會造成頗大壓力。
坦白講，樓價再升機會係有，但絕對唔大，相反一言更傾向相信已經見頂，或離見頂不遠；今天買樓，或許樓價尚有少許上升空間，但隨時開心唔夠一兩年就由喜轉悲，總言之提醒大家一句，想買樓，忍吓手。
政府出招後，發展商搶住放貨。
