與長毛鬥爛 建制雙辣一「字」成名
農曆新年，政圈四處火頭，連日「赤口」。年初五，先有「愛護香港力量」召集人陳淨心火併社民連梁國雄，陳一句「我係咪建制派關你叉事呀？」，被港台「嘟」走處理，結果一「嘟」爆紅。
四日後，長毛再於立法會與民建聯副發言人馬恩國罵戰，馬大狀憑一句「You're not even a fxxking Chinese！」迅即竄紅，YouTube點擊率直逼三十萬。
跟長毛鬥爛，令兩人一夜間一字成名，改圖、惡搞在網上瘋傳，不過，辣妹視若等閒：「要我封口就唔係陳淨心！」馬恩國說，如果公眾覺得不安，他願意道歉，「不過唔包括長毛，我當日只係想講，長毛唔X係中國人！」
愛港力痛恨民主派，但亦不齒建制派的行為：「我哋有人九一年投票畀李柱銘，之後都改投民建聯。民建聯候選人握手多謝佢，佢話，『唔使多謝，我唔係支持你，只係有人比你更差。』」陳淨心說。
陳淨心小檔案
組織：愛護香港力量召集人，網名潮州辣妹
背景：自稱家庭主婦，無政治及社團聯繫
參政原因：因不滿社會現狀、不滿建制派發聲無力而參與政治
一「嘟」成名的陳淨心與記者一碰面，即時爆發「辣妹」本色，一輪嘴地數個不停。
「『關你叉事』是我的口頭禪，我不覺得是粗口，長毛幾次話我係『政權嘅一條狗』，又不斷問我係咪建制派，係惡意挑釁，我EQ好低o架，一嘢咪將口頭禪掟過去囉！佢鬧我係狗，又唔『嘟』？有個組織叫『調理農務蘭花系』又有冇被『嘟』？」
一「嘟」成名，辣妹認定港台有心誤導市民以為她講粗口，要求港台鄭重道歉，否則會「向各業界及各國駐港領事新聞處提供港台造假證據」。
狙擊公民黨成名
被「嘟」到火起的陳淨心是潮州澄海人，自稱家庭主婦，無黨無派，「潮州辣妹」是她自己改的網名，「我講嘢一針見血，夠晒辣。」有網民起底指她有潮州勢力撐腰，又做過新界青年聯會副主席梁錦培助理，她統統否認，但承認識梁錦培。「佢以網民身份私人支持我哋，我係後來先知佢身份，我哋冇收任何人錢，我哋係民間組織，同政黨無關。」
前年年中，一班網民不滿公民黨參與外傭居港權及港珠澳大橋官司，成立了「愛護香港力量」，多次帶頭狙擊公民黨，自此被視為隱形左派組織。
「愛港力」亦是政府忠實粉絲，經常站在最前線支持政府，不過遊行示威多次出現肢體衝突。去年十二月三十日的撐梁大遊行更有人打記者，令組織被冠以激進之名。
「我哋只係想透過行動問一些政黨，點解要損害香港人利益，扭曲年輕人價值觀？」民主派發起的元旦遊行參與人士以十萬計，大學民調顯示梁振英支持度每下愈況，陳淨心有她一套見解，「我哋試過同泛民一齊擺街站，四個鐘內不斷有人嚟簽名支持我哋，隔籬就拍烏蠅，呢啲就係我親身感覺嘅民調。大學民調做得咁密，但我從來冇收過電話。問題有冇引導性？有冇造假？好容易出蠱惑。我身邊個個都支持政府，唔明點解咁大差距？」
愛港力成立近半年，曝光率遞增，多次拉大隊出席各大小場合挺梁，與民主派對撼。
建制派屙尿都冇力
外界視「愛港力」為建制組織，不過辣妹批評建制派一樣辛辣：「如果建制派勇敢啲，就唔會有我哋呢啲民間組織。人哋反國教，點解政黨唔大大聲支持？太溫和，屙尿都冇力，我唔覺得香港有建制派，只有破壞派同騎牆派。」
人人恐共，不過陳淨心直言渴望成為黨員：「冇共產黨中國已經被瓜分，可惜我唔夠班！」語氣激昂，但話題轉落港台，淚水又頓時奪眶而出，「後生仔冇感受殖民統治之苦，港英旗回歸後已經係廢旗，港台憑咩將咁有恥辱嘅旗同國旗並列？」
陳淨心表示，自己無政治野心，她是個土生土長的香港人，幼稚園、小學、中學都在香港讀，阿爺六十年前來港，但她一句潮州話都不懂，「你話我係新移民定舊移民，我都唔識分。好多人問我點解咁討厭長毛，好簡單，因為我最憎兩種人，一種係神棍，一種係政棍！」
