泛民少壯派 焗大佬佔中環
港大法律系副教授戴耀廷提出「佔領中環」爭普選，近排愈講愈熱。人民力量陳偉業就食住上，話今年七．一先行預演，發動萬人佔據中環二十四小時，但戴耀廷就表明唔會同人民力量一齊玩，擺明唔想畀佢哋抽水。
泛民線人指，戴耀廷一向同公民黨關係密切，與民主黨一班新進少壯派亦傾得埋，呢兩批人好buy戴教授個建議，早前更相約開過一次閉門會議，商量如何落實行動，並準備「焗」兩黨阿哥阿姐去馬，帶頭號召市民湧入中環。
不過民主黨大佬如前主席何俊仁，對發動群眾堵塞中環有保留，認為去得太盡可能令溫和中產反感，因為中環係香港商業金融心臟地帶，如果交通癱瘓，對經濟影響好大。
阿爺對事態發展亦好關注，已頻頻透過第三者向泛民人馬收料，並做說客希望泛民唔會搞得太激。自由黨某君便曾與泛民成員傾過偈。
