政府早知雍澄軒拆售 CY扮嘢
近排振英哥民望唔多靚仔，據港大民調，過半市民反對佢做特首，比上次又升咗，可能佢想拉番高分數啩，最近對長實拆售雍澄軒酒店業權單嘢，表現得特別肉緊，高調下令手下部門從各方面查清事件，密切跟進，要求賣方提供資料，好似發展商做咗啲唔妥嘢，政府要執正嚟做，對財團唔會客氣咁款！
振英哥出呢種招數，已非第一次，普通市民未必睇穿，但了解過實情嘅政圈人士就一語道破，話政府早已知道係乜事，只不過詐傻扮懵啫！佢憑乜咁講？原來翻查資料後發現，地政總署署長早在二○一一年五月就畀信長實嘅代表律師，批准將雍澄軒分契，不過要於廣告及銷售冊子清楚講明，出售嘅房間只可以用嚟做酒店房，即係話，地政署已預咗發展商遲早拆散嚟賣。當時林鄭做緊發展局局長，地政總署係佢屬下部門，應該一早知道政府已批咗。
振英哥對雍澄軒拆售表現肉緊，指令手下查清事件，密切跟住，其實政府早已批准長實拆售酒店，亦知道發展商會咁做，政圈人士認為振英哥擺明「扮嘢」，以挽民望危機。
到咗舊年年尾，長實賣出首個雍澄軒酒店房間，同買家簽晒買賣合約，政府應該察覺到發展商已開始分拆酒店出售，如要查清件事底蘊，睇吓文件就知，何解直至上星期一批房間拆售後，林鄭同陳茂波至忽然咁大陣仗，又話要跟進，又話要長實解釋？
翻閱二○○二年政府批出嘅雍澄軒酒店地契，其實已有條款訂明發展商長實日後可以將酒店拆售，因為當年香港經濟甚差，物業紛紛暴跌，旅遊業亦唔好景，政府為咗鼓勵發展商投資興建酒店，故批地畀長實時，訂出寬鬆條款，以後如經濟好轉，可以拆售補番數。行內專家講，政府呢種做法過往亦有先例，並非益個別發展商。
睇番成件事，由董建華做特首之時，到煲呔主政年代，政府都向長實清楚表明可以拆散酒店嚟賣，但振英哥上台後，又有另一種態度，對長實依足地契條款嘅做法諸多質疑，令人覺得交易問題多多咁，難怪有政圈中人認為，佢順住民粹情緒，擺出同地產商對立姿勢，以紓解民望危機，為此不惜「扮晒嘢」。但咁做有個負面效果，令人覺得政府朝令夕改，施政冇連貫性，威信只會更低。
