面無善痣係咪必脫?
上期我同大家講過整容不一定會令運程變得很差,如割雙眼皮這小手術,因為外觀轉變較小,故影響就不大,但相反如果整的部位是鼻同下巴的話,就真係要三思而行,因為前者會影響財運,後者就會影響晚年的運程,故整得不好,後果非常嚴重。
今期我就同大家講講另一個女生最關心的問題,就係「面無善痣」係咪見痣就要脫?
不論長在面上的是痣或癦也好,有時除咗會影響儀容之外,亦有傳「面無善痣」,意思即係總之生於面上的痣或癦都不會為你帶來好運,但其實不是甚麼痣或癦都是不好的,如紅色或肉色的則不會影響運程,黑色的就要注意,特別是生於以下四個位置,如痣或癦生於此,咁你就要考慮脫一脫佢喇!
1.鼻頭有痣 常破財
由於鼻是代表一個人的財運,所以鼻上生有痣的話,一生中都會較易破財,所以想有財運的話,就要脫走它喇!
2.顴位有痣 小人多
顴代表人的權力,跟事業和人際關係有着密切的關係,而顴上有痣的話,即代表工作上和生活上都會有很多小人出現,令你冇日安寧。
3.眼尾有痣 桃花劫
眼尾有痣又稱為淚痣,眼睛代表情緒、感情,而長有淚痣的人會容易遇上桃花劫,或者同另一半感情出現問題,婚姻難以美滿。
4.印堂有痣 一生勞碌
印堂即係額頭,之前都同大家講過額頭代表一個人的少年運,如果額頭有痣就代表此人沒有父蔭,沒有貴人扶助,故做任何事都勞碌辛苦,特別是少年時期幾努力都好,都係得個做字。