鬍鬚曾學星爺 出招「估我唔到」
振英哥施政報告終出籠，拋浪頭話中長期供應會大增，但市場睇穿佢「二仔底」，當佢冇到繼續盲搶樓，搞到十大屋苑成交升四成，樓價紛紛破頂，用行動話畀政府知：「你冇料到！」官場老友指，政府出招最忌放空炮，應該好似星爺嘅經典對白：「你估我唔到！」一出就嚇窒人，財爺鬍鬚曾貌似老實，呢方面就蠱惑過振英哥，學足星爺神髓。
老友透露，一○年尾樓價起到嘭嘭聲，政府好驚泡沫愈吹愈大，一爆就大鑊，當時鬍鬚曾知道一定要出手，諗到兩招，一是失驚無神殺出重招徵「額外印花稅」，二是提出復建居屋，煲呔否定咗第二招，於是最後就單拳一擊，推出三級SSD，最高達百分之十五，結果唔少炒家離場，樓市逐步降溫，如果當時雙拳齊出，效果會更加震撼。
星爺有句經典對白：「你估我唔到！」鬍鬚曾學足箇中精髓，運用「唔聲唔聲」策略，幾次出招壓樓價都失驚無神，嘭一聲嚇窒個市。政府今次招數由振英哥主導，就以空炮居多，市場解讀為「冇料到」，繼續發癲。
鬍鬚曾知道政府要同市場博弈，就好似玩show hand咁，對方唔知你手上有張靚牌，以為你冇料到，正正係出招最好時機，因為對方估唔到你咁辣，突然見你出重手，必定嚇到面青，就可以發揮「估我唔到」的震懾效果。事前最好無聲無息，討論諮詢放風乜都冇，一出手就嚟料，殺對方措手不及。佢老哥長年學洪拳，知道出招同打功夫一樣，一拳就要擊中要害。
老友指，今次振英哥出招，虛招多多，實招冇乜，只講中長期供應而短棍全無，市場覺得佢虛張聲勢，視之為無牙老虎，「噓」一聲之後，搶貨嘅繼續搶，托價嘅繼續托，顯示施政報告發出的訊息冇乜作用。其後振英哥話考慮向發展商徵空置稅，外邊多認為此招實行唔到，又係得個噏字，更加唔會理，示威不成反示弱，效果更差。
振英哥另一招是成立一大堆委員會，公務員要花大量時間精力侍候，視之為實效不大的添煩添亂之舉。
咁鬍鬚曾會唔會再失驚冇神出辣招？老友認為現時已非出招好時機，佢老哥最近表示有好多招數可出，好似隨時會出拳咁，反而顯示佢只係出口術，因為如果真係出招，就唔會畀你估到！
至於振英哥成立多個委員會，搞出個「委員會治港」局，老友就話公務員唔會高興，因為咁多委員會一齊運作，開會多過共產黨，每個會議都要一批公務員侍候，又要定議程，又要寫報告，必定煩到嘔，做實事的時間更少，點會唔XX聲？
早兩日林鄭上電台話：「CY畢竟不在政府做慣，程序和部門之間的協作，他要加強認知，他已很努力去做。」聽落好似正面，但老友認為佢說話中有骨，意指CY仲未好識揸政府架車，如果由佢主導打亂章，施政只會更差。
