金晶火眼
要數娛樂圈「3大慧眼」，王晶晶哥必定榜上有名，佢縱橫影視界逾30年，經佢發掘、改造嘅巨星不計其數，近年佢轉戰內地，同樣發掘到唔少明日之星。今晚我就誠邀晶哥，聯同佢近年發掘嘅其中一位新人胡然（Michelle），擔任「Paco巨星飯堂」嘅嘉賓。
有晶哥呢位重量級嘉賓，我梗係精挑飯敍地點啦！今晚我帶兩位貴賓去到位於銅鑼灣嘅「五箇山Gokayama」，品嘗由日本大廚炮製嘅地道料理。
今晚我同晶哥（右）、胡然（左）喺「五箇山Gokayama」歎正宗日本料理。
揀蟀規條
經晶哥改造過嘅藝人，有發哥周潤發、劉華、陳小春、張家輝等人，個個依家都係獨當一面嘅超級巨星；經佢發掘嘅新人，有邱淑貞、林熙蕾、舒淇等，對於晶哥嘅眼光，我從不懷疑。
最近上映嘅《古惑仔：江湖新秩序》，晶哥力捧佢新近發掘嘅新人胡然（Michelle）、童菲，分別飾演陳浩南嘅女朋友。晶哥坦言，兩位新人都係經過千挑萬選先突圍而出，「揀新人嘅第一條件，一定係觀眾緣，即係望落去一定要順眼；第二要睇佢哋嘅性格，其實同胡然、童菲同期嘅，仲有兩個新人，但係經過一段時間之後，我發現嗰兩個做嘢冇heart，所以就淘汰佢哋。
晶哥傳授揀蟀心得。
胡然首次擔任飯敍嘉賓，我一盡主持之誼。
「喺大陸揀新人，好多人都選擇學院派，我就覺得，學院派冇錯係紅褲子出身，但係嗰陣學院味要幾年先會減褪，所以一班學院派到真係紅得起嘅時候，年紀都已經挨三（近30歲），太老嘞！
「我要啲後生啲嘅，所以就去咗唔同嘅大學揀，好似胡然咁傳媒大學揀嘅，佢哋係一張白紙，演技係要浸，但係就啱番香港市場多啲！」
薄切真鱈魚（$350），鮮甜！
3道前菜，啱晒佐酒。
珍貴嘅黑松露係嚟自法國，名為Black Winter Truffles from Perigord，特別新鮮。
再行古惑
哈哈哈！晶哥嘅慧眼，我絕冇懷疑，好似拍板再拍《古惑仔》系列，亦係出自佢嘅主意。「我見《Spiderman》拍咗都未夠10年，又拍過仲要又得o架喎，咁《古惑仔》都係一樣啫。不過，喺人腳方面都要諗吓，所以我就借咗TVB一班入咗屋嘅演員，謙仔、林子善同唯唯，加埋之前睇《喜愛夜蒲2》，見到Sammy（沈震軒）同Dominic（何浩文）都唔錯，Philip（伍允龍）打得，一定係『大頭仔』啦！
「最花心思諗反而係『大佬B』，因為原著《古惑仔》已經係用志雄哥（舊《古惑仔》系列『大佬B』）作藍本，而志雄哥本身亦做得好好，於是我就搵咗阿Paul（黃貫中）呢個真Rock友，佢嘅紋身係NBA球星同英超球員嗰種潮，但喺中國人嚟講又有一種江湖味，啱晒啦！」
晶哥好橋不絕，佢率先透露《古惑仔》第2集會改由浩南走難到台灣。
我同兩位嘉賓，言談甚歡。
鹽燒A40飛驒牛（$300/55g），惹味！
燒物同煮物，各具特色。
黑松露飛驒牛刺身（$450/50g），比普通牛肉多一分牛味，一定要試！
天津新貴
至於胡然飾演嘅「超婷」，亦被晶哥力讚，「胡然好有heart，唔係hea住做嘅演員，我目標係將佢打造成新嘅林熙蕾。」
得到晶哥栽培，胡然又點可以交行貨？呢位嚟自天津嘅小妹妹，正在努力學廣東話，「《古惑仔》之後，我還有《馬永貞》遲些在香港上映，我想如果不是入了這一行的話，現在我跟我的同學一樣，在電腦程式公司工作吧！」
唔講唔知，胡然大學時係主修電子信息工程系，同佢嘅外形完全唔配合，「以前我理科的成績比較好，所以就向這方面進修，跟現在要演戲一樣，都要鑽研一下了。」
哈哈哈！如晶哥所言，有heart係成功嘅一部分，胡然踏出第一步，加上晶哥力捧，要做出成績，只係時間問題啫。
我同兩位嘉賓，與餐廳老闆Kelvin（後排右）同大廚片山先生（後排左）乾杯！
胡然同發哥有一面之緣。
講到演藝事業，胡然充滿憧憬。
黑松露刺身拼盤（$800/2人前），份量十足。
壽司拼盤（$440/2人前），用料新鮮。
