葉劉「溝」兩男 想收編入黨
振英哥今次搵埋葉劉入行會，早在選舉前已有此意，只係等埋佢當選至扑錘。葉劉同田二少雙雙入局，新民黨議席倍增（由一變二），數目嚟講唔算多，但葉劉做過多年高官，性格又強悍，喺議會有震懾力，佢加入行會後，喺重要時刻，點都會幫振英哥一把，至少唔會勁插。
據政圈消息，葉劉仲想擴大版圖，有意收編保險界議員陳健波及醫學界議員梁家騮入黨，如果成功，議席再加兩個，實力即大增，到時就唔到政府唔睇佢！不過呢兩位仁兄都唔想同政黨埋堆，葉劉好難溝掂佢哋。
幾個月前，葉劉亦曾經向謝偉俊埋手，搵佢出嚟食飯，想拉佢入黨，但阿Paul耍手擰頭，加埋白姐姐向來唔多鍾意葉劉，所以最後冇成事。食過檸檬後，睇怕葉劉已對阿Paul死心，唔會再吃回頭草。
