四大惡人 勿親近!
早兩期我已經教咗大家點樣以面相取人,分辨誰是怪獸老師、誰是善良老師,見到怪獸老師就要九秒九鬆人,而見到善良老師呢?梗係要冧吓佢,等測驗考試攞A都易啲。
不過,識得冧老師之餘,都唔好忽略同你對足一年的同學仔,同他們搞好關係,認識他們的個性,事關好同學可以助你成功,壞同學累你留堂罰抄冇陰功!尤其是要留意四大惡人的面相,切勿親近!
第一大口大露齒:相信好多同學仔都鍾意同其他人分享吓自己的生活私事,或者心中的秘密,但若然你見到個同學仔,係口大大、牙齒露現的話,咁你就最好收口喇!皆因有呢種面相特徵的人,大多口沒遮攔,難以守秘密。
第二大顴骨粗橫:雖然班主任都會定時定候為同學仔換位,但係換極都係朝見口晚見面,如果同啲同學仔有爭執,真係麻煩喇!所以大家要知難相處的面相特徵是甚麼?就係顴骨粗大兼且向橫生。此人屬於管家婆性格,乜都要管、乜都要理!
第三大眼大而兇:顴骨粗橫的人通常都係管家婆性格,係就係唔友善,但未至於係惡人。反之眼大而兇、口大無菱(意謂:唇形不明顯)的人,就真係惹不得、交不得,因為他們通常做事衝動,又脾氣差,一唔小心得罪佢,必定畀佢鬧到死呀!
第四大眼細眉耷:為人鬼祟的面相特徵就係眼細細、眉耷耷,看似冇食飯、冇嚟精神。這類人雖然唔會同你有正面衝突,但他們就會鬼鬼祟祟咁,同老師篤你背脊,或喺你背後說三道四,非要令你成為眾矢之的不可。