袁文傑激嬲女友
九一年參加無綫電視藝訓班出身嘅袁文傑，六呎有一，外形俊朗，但唔知點解入咗行咁多年都撈唔起，可能係因為佢喺九六年決定轉投亞視有關啩。雖然佢喺亞視工作不斷，但係知名度就真係麻麻。屈指一計，袁文傑今年都已經四十歲，咁多年嚟都冇乜聽到佢有緋聞；不過，最近東姑收到風，佢依家正同緊以前喺無綫做兒童節目嘅Jackeline姐姐（張潔蓮）拍拖。
日前，東姑仲喺港鐵巧遇呢pair拖友，之但係嗰日Jackeline個樣嬲爆爆，梗係男朋友仔唔聽話激親佢啦！當時袁文傑一面o氹佢，Jackeline就叉晒腰咁回應，似乎鬧得好僵。唉，Jackeline今年都三十六歲啦！少啲港女性格，咪快啲嫁得出囉！
畀男友激親啫！唔使叉晒腰好似講數咁卦，Jackeline以前係主持兒童節目嘅噃，唔係好有愛心、好溫柔o架咩？
袁文傑一面o氹，Jackeline就一面鼓起泡腮兼面黑黑，使唔使咁嬲呀？有咩事咪唔啱講到啱囉。
