嚴父大AL靠老婆做橋樑
不論是唱着〈鬼叫你窮〉、〈追龍〉,還是飾演無綫劇《絕代雙驕》中半人半鬼的陰九幽,聲音沙啞的大AL(張武孝),由舞台走到娛樂場所,總是亦正亦邪,甚有大佬feel。
但浪子也有回頭時,四十多歲的他,為結婚而搵老婆,太太黃燕芳(Joann)是八七年的香港小姐,三年內先後為他誕下一女一子。大AL幸福滿瀉,卻怕人家說他重男輕女,反過來重女輕男,「我好錫個女,覺得女仔係要保護,好驚佢跌親;但個仔跌倒嗰陣,我就會話『唔好扶佢』。」即使連太太都指摘他不懂教細路,埋怨要經常做兩父子的和事老,七年前,他卻為了親近怕煙味的兒子而戒煙,他緊皺眉頭說:「我都學緊點同對仔女相處,自己都好矛盾,我好錫佢哋,但有時又會冇耐性,郁啲就呼喝佢哋,但坦白講,一對仔女喺我心目中已經相當唔錯!」
六十二歲的大AL,少了邪氣,處處流露着父愛。
四十五歲才成家立室的大AL,直言聽從太太的吩咐,於三年內誕下一子一女,更要感激太太教子有方,讓不懂跟子女相處的他,減輕了不少壓力。
大AL年輕時的形象不羈又瀟灑,帶點o架仔feel,瘋魔萬千少女。
中學時代已經自組樂隊的大AL,由走廊唱上舞台,彈得一手好結他。
重女輕男
大AL原名張武孝,英文名Albert,中學時自組band隊,隊中鼓手也叫Albert,他年紀較長,因此有「大AL」的綽號。
由夾band到唱酒廊、的士高,再加入無綫,大AL邊唱歌邊拍劇,〈鬼叫你窮〉、〈行快啲啦〉、〈追龍〉唱到街知巷聞,三十歲時卻因喉嚨生繭失聲,事業上遭遇大打擊,遂轉行開設製作公司,後又轉到夜場任公關經理。
在單親家庭成長的他,一直未有結婚的打算,至四十多歲,孤家寡人在天津工作,病倒了卻無人照料,才急着找老婆組織家庭,結果拍拖九個月便結婚;太太是八七年的香港小姐黃燕芳,曾任職模特兒,比他年輕十五歲,婚後三年即為他誕下一女一子,女兒Turbie現已十四歲,兒子Hayson十二歲。大AL說:「一對仔女都唔係意外嘅,太太要我五十歲前要完成生仔任務嘛。仔女讀書嗰啲嘢,通常太太負責,我比較冇耐性,如果媽咪講佢哋唔聽,我就會出聲o架喇,大大聲喝囉,所以佢哋都好驚我。」
大AL是傳統潮州人,重孝道,卻非重男輕女,「我覺得個女係需要保護嘅,佢哋細個,我好驚個女跌親,但個仔跌親嗰陣,我就會話『唔好扶佢』,所以細佬覺得我錫家姐唔錫佢。」大AL苦笑着說。
大男人不解溫柔,也不會將愛掛在口邊,Joann即連忙補充說:「其實老公覺得男仔應該保護番家人,要剛強啲,但個仔嘅性格比較依賴、軟弱,所以佢先對個仔要求高啲、嚴厲啲啫。」
大AL的太太Joann曾參加八七年的香港小姐競選,對於丈夫重女輕男,她補充說:「個仔嘅性格比較依賴、軟弱,所以佢先對個仔要求高啲、嚴厲啲啫。」
大AL與兒子雖然經常為小事爭吵,但心底裏卻非常痛錫子女,每到假日必定陪伴他們到處遊玩。
拉近距離
大AL的一對子女出世時,他正在天津管理一個中港合資的娛樂城,半年才返港一次見家人,後來轉到東莞工作,一個月與子女見面兩三次,關係未算緊密,全靠太太Joann從中拉近父女、父子間距離,Joann說:「老公係一個大男人,亦都未照顧過小朋友,兩個仔女可以講係一路跟住我成長。佢喺大陸做嘢嗰陣,返到嚟探我哋,冇話要理吓啲小朋友,只係覺得佢返嚟就要enjoy對仔女,帶佢哋去玩呀,難聽啲講,佢係唔識得湊小朋友,唔識得企喺小朋友嘅角度諗佢哋嘅感受。」
她舉例說:「好似佢唔鍾意睇卡通片,就唔畀仔女睇,咁我會同佢解釋番,仔女係小朋友,睇卡通片係正常o架;同時,我亦會同兩個小朋友講,爸爸要尊重,同爸爸講嘢要有禮貌。講真,老公同對仔女係有代溝o架,個仔成日都同爸爸嗌交,我咪先講服咗個仔,再同先生溝通吓。我係佢哋之間嘅橋樑,我要喺兩邊去教!」
在旁聽着太太批評自己的大AL,沒有動怒,也沒有反駁,他承認自己不是好爸爸的榜樣,也希望向親子專家兼港台節目《訴心事家庭》主持人鄧藹霖傾談,從中學習如何跟子女們相處,他緊皺眉頭說:「我覺得同仔女好似有隔膜,佢哋驚咗我。其實我好錫一對仔女,但有時又會冇耐性,郁啲就呼喝佢哋,但坦白講,一對仔女喺我心目中已經相當唔錯,譬如佢哋想飲可樂,我同太太唔喺屋企,佢哋都會打嚟問我哋畀唔畀佢哋飲,都幾乖o架!」大AL看着身旁的兩位寶貝,漸展歡顏。