陽光妹何思諺 愛母多一點
去年九月，因拍攝陽光檸檬茶廣告成名的何思諺（Leanne），與樂隊Mr.鼓手杜志烜（Tom）宣布奉子成婚！喜事一椿，卻換來「搞出人命」、「撬姊妹（蔡穎恩Eyelyn）牆腳」等負面評價，但一切閒言也動搖不到兩位當事人的愛，以及留下小生命的決心。
今年二月，愛情結晶品誕生，雖然二十一歲的Leanne仍是日系打扮的少女，兒子恍似是她手中的玩具，但心態卻成熟靠得住，「我十五歲嗰陣，最細個妹出世，嗰陣我見媽咪咁辛苦，已經叫佢唔好再生，『等我生喇』。自己做咗媽咪，更知道母愛嘅偉大，嚟緊嘅母親節會係好難忘，除咗因為我都係人哋媽咪外，亦都令我識得點樣去愛多啲媽咪、錫多啲媽咪！」Leanne猛力點頭的說。
Leanne去年十月與Mr.成員阿Tom奉子成婚，兒子杜卓霖（Jasper）於今年二月中出世。
三代同堂
來到Leanne的模特兒公司，兩個半月大的杜卓霖（Jasper）伏在媽媽懷中飲奶，身旁的婆婆則忙着打點，一時拿出紗巾，一時為孫兒蓋着毛巾，四十來歲便可享三代同堂的福份，就算再忙，也是值得。
Leanne打趣說：「我媽咪都係二十歲度就生我，我以前都希望二十一歲結婚生BB，估唔到真係可以如願，好似注定咁！」她下有三個妹妹，分別是十五歲、十歲及七歲，換言之，Leanne十五歲時，幼妹才出世，其時她還跟媽媽說：「你唔好再生喇，等我生啦！」
她續說：「因為覺得佢好辛苦呀，又要照顧我哋幾個，又要教我哋。自己做咗媽咪，真係覺得媽咪係一個好偉大嘅人，由佗住個BB，到生佢出嚟，然後又要慢慢陪住佢成長，真係好偉大！今年嘅母親節，最難忘唔係我自己成為咗母親，而係令我知道，我要更加錫媽咪多啲，對佢再好一啲！至於第時個仔會點同我慶祝母親節，我就冇乜所謂，就算佢喺街度摘朵花畀我，我都會好開心，因為做人要識得『知足』，呢點係媽咪教我o架！」
兒子扭計，Leanne試圖讓兒子破涕為笑，可惜似乎有點難度。
