陳浩德 金童玉女心經
近年，「金曲金童子」陳浩德的演唱會上多了一個妙齡少女擔任嘉賓，這少女能唱善跳，貌似「樂壇新人王」林欣彤，無論合唱、獨唱皆有板有眼，觀眾的歡呼聲、掌聲不亞於陳浩德。這少女，便是陳浩德的幼女陳芷羚。
七十年代出道的陳浩德，來到今天，依舊瀟灑倜儻，同一屋簷下，既有與前女友所生的二十歲女兒，還有跟前前女友所生、今年三十六歲的兒子陳子龍。兩個女人，沒有名份，卻為陳浩德留下一子一女，翩翩公子忽變湊仔公，「我覺得教仔女最緊要係溝通，同佢哋傾多啲偈，總之唔係做壞事就得喇，反而係個女管我就真呀！」慶幸囝囝獨立、囡囡黐家，讓沒有女主人的家仍覺圓滿。
看見爸爸將高球打入洞，二十歲的芷羚興奮得跳起。
七三年出道的陳浩德，曾組織樂隊，一直活躍於各大會堂及酒廊演唱，近年經常於文化中心或伊館舉行個唱，並與呂珊、方伊琪等合作無間。
有女萬事足
「兩個女士依家同我嘅關係都好好！父母離婚，兩個細路梗係有唔開心，但佢哋同媽咪都有經常見面；我開演唱會，個女嘅媽咪都有嚟睇，其實分唔分開都冇乜分別。」陳浩德說得淡然。
他形容一對子女都是意外得來，第一段感情因女方年紀太輕，不甘於困在陳浩德位於大埔林村的家，結果因為工作獨自遷出九龍而分開；第二段感情，則因性格不合而告終，「嗰陣個女都四歲，讀幼稚園，已經安排好晒校車接送嗰啲嘢，咁佢媽咪就放低佢同我一齊住，所以我同個女感情咁好。其實我依家有個女朋友，行咗好多年喇。唔通做寡佬咩？仔女都知o架，囡囡叫我女朋友做姐姐嘅。」說到私人感情，陳浩德擺出欲言又止的表情，卻又坦承地交代一切。
陳浩德與子女、孫兒住在同一幢村屋中，芷羚跟同父異母的哥哥子龍相處融洽，哥哥一家住在樓上，因此，芷羚經常幫忙照顧姪女和姪仔。
「以前一對仔女啲功課由我嚟睇o架，不過到咗佢哋讀中學，我就要交畀補習老師幫手喇。老實講，我唔會好嚴咁管啲細路，個仔性格咁獨立，一路都唔使我操心嘅；至於，個女又好聽話、好黐我，佢最好唔好咁快拍拖添呀，仲要跟住我四圍去嘛。我覺得教仔女最緊要係溝通，同佢哋傾多啲偈，盡量畀佢哋自己去行自己嘅路，總之唔係做壞事就得喇，反而係個女管我就真呀！我以前去唱歌，佢到時到候就打嚟話：『我依家要你即刻返嚟！』所以每次做完嘢，啲人就放我走先o架喇，要返去湊女吖嘛。」陳浩德語畢即笑着望向身旁的女兒。
