玄學家周漢明父女檔
周漢明，縱橫風水界三十年，現時不僅是電訊盈科、花旗銀行、荷蘭銀行等大企業的御用風水師，更曾於○五年應法國伯爵夫人瑪利安娜之邀，往巴黎勘察風水，同時為八位身份顯赫者推算命理。
周師傅心足的，不只因為辛勞得來的名與利，而是二十四歲的女兒周亦彤，數月前正式拜師其下，伴隨在他的身旁，「我心中有數，個女喺某個年齡就會跟我學術數，所以，以前我從來唔會逼個仔或者個女學。始終風水屬於中國人嘅寶藏，唔應該失傳，有個女去承繼我呢樣嘢，我覺得非常好！」父女拍檔搵食，肯定天下無敵。
著名風水學家周漢明，育有一對二十四歲的龍鳳胎，幼女周亦彤數月前開始跟隨父親學習風水術數。
化險為夷
育有一對龍鳳胎的周師傅，長子名周浚浩，幼女名周亦彤，兩個子女的名字皆由他而起。三十年來，他除了四出勘察風水外，也為家中至親計算命運，推測將會發生的好事、壞事。
這不算是洩露天機嗎？周師傅強調不是，只是化險為夷，將大事盡量化小，他說：「化，即係減輕，或者延長，而唔係將要發生嘅事化到冇；好似一對仔女細個嗰時，我主要計佢哋有冇病痛，跟住再睇吓學業，睇佢哋喺邊方面發展會好啲；譬如算到亦彤喺藝術方面會有成就，佢細個嗰陣鍾意畫畫咪畀佢畫囉，知佢音樂唔得嘅，就唔好學咁長時間喇，咁咪可以慳番好多無謂嘅時間！依家好多家長成日希望仔女成龍成鳳，乜嘢都畀佢哋學，結果周身刀，冇一把利，嘥時間嘥金錢，又嘥精神。」
周太為家庭主婦，主要照顧一對子女的起居飲食，周師傅閒時必定與家人到處外遊，享受天倫樂。
亦彤畢業於加拿大的藝術學校，回港後，擔任畫畫老師，轉眼已兩年；浚浩則在醫院工作，並進修放射治療課程。周師傅形容，一子一女性格迥異，從初生時一黑一白的膚色已反映出來。「太太懷孕嗰陣都計到係孖胎喇，知道裏面係一黑一白，但唔知係龍鳳胎，結果，佢哋一出世，好得意，個女真係白雪雪，個仔就黑蚊蚊。性格都係兩個極端嚟o架，個女性格好活躍好多朋友，個仔就內向啲冇乜朋友，比較沉默嘅。我心中有數，個女喺某個年齡會跟我學術數，個仔喺呢方面就冇乜興趣嘅，所以由細到大，我都唔會逼佢哋學，只係耐不耐同佢哋講吓，等佢哋知道有風水術數呢樣嘢存在。」
的而且確，數月前，亦彤主動要求跟爸爸學習術數知識，希望他朝可像爸爸一樣「咁叻」，亦彤說：「以前，爸爸教我喺屋企擺咩嘢陣，我都會照擺；識到新嘅朋友，都會帶畀佢睇吓。呢個朋友係唔係好人，值唔值得結交，當係參考。我覺得我好好彩，有個咁好咁叻嘅爹哋，我好多謝佢教我咁多嘢！」
