朱凱婷不要港式公主
朱凱婷，○一年港姐季軍。當同屆冠軍楊思琦狠心拋棄拍拖九年的男友李泳豪，另結新歡吳帥時，她已經與拍拖五年的飛機師男友Dickens拉埋天窗，如今懷孕八個月，向幸福美滿家庭進發。
從結婚到造人，一切按照朱凱婷的計劃進行；不過，子女的前途卻未必可以如她所願；她只希望秉承母訓，培育腹中女兒的獨立、自理能力，「我唔想佢成為港孩，乜都有人幫佢，又命令工人姐姐做嘢；佢一定要明白，唔靠自己努力，好多嘢都係得唔到o架，我諗我同老公都會對囡囡好嚴謹！」朱凱婷表示乖女可以自由抉擇是否參選香港小姐，但卻萬萬不能做港式公主！
懷孕八個月的朱凱婷，增磅二十磅，笑指自己「開始論盡」。
喜悅
去年九月，朱凱婷下嫁拍拖五年的飛機師男友Dickens，事隔半年，兩人已成功造人，個多月後女兒便會出世。提到造人大計，朱凱婷感恩說是上天賜予的禮物，「本來婚後諗住一年後先開始造人，不過，過咗半年後，已經同老公去咗幾次旅行，過足晒二人世界，倒不如提早造人提早生啦，不設防兩個月度，已經成功咗喇！」朱凱婷說時喜上眉梢，由內至外散發將為人母的快慰。
回想大半年前驗孕的情景，朱凱婷笑言在凌晨時份拿着「有料到」的驗孕棒，跟老公大笑大嚷，更高興得拿出手機拍低懷孕「證據」。
朱凱婷在去年九月下嫁拍拖五年的飛機師男友Dickens，並於洲際酒店筵開四十二席招呼親友。
「咁當然啲相係唔會公開啦！到有咗三個幾月嗰陣，有次我着住內衣褲，準備試着第二晚做司儀嘅衫，突然發現我原本好凹嘅肚臍已經冇咁深，開始感覺到肚裏面BB嘅存在，我又即刻影低相send畀老公睇。佢初時唔明，以為我搞乜，影埋啲咁嘅相畀佢睇，仲叫我小心冷親添呀！」
朱凱婷的丈夫Dickens任職飛機師，一個月約有一半時間不在香港，不過太太懷孕後，他堅持調配工作，以遷就產前檢查及產前班的時間，就連這次訪問安排在他的上班日，他也一度擔心不已，為自己不能親自駕車接載太太進出而感不安！朱凱婷說起老公的過分憂心，既嘲又喜，甜蜜地說：「喺呢個懷孕過程入面，我老公真係參與咗好多好多！」當然，懷孕四個月可以公告天下的喜樂，不比此遜色，「因為發覺好多人都好關心自己，就連朋友嘅老公、一啲男性朋友，都自動傳授生仔經畀我，令我多咗好多溫暖之外，亦多咗好多知識。」
