劉央投降的啟示
股市近個幾星期有啲起色,但大部分人都話,呢轉升完後,將會有更深度下調。一言都相信,股市呢次反彈後應會續尋底,但小弟認為上次低位萬六點會有一定支持,即使再跌,萬四萬五點水位應該差不多。
點解會咁講?一言睇到近期唔少大牛友都陸續投降,好似被稱為「終極牛王」嘅中信分析員林一鳴,早前就唔再堅持牛市論;但最矚目肯定係被市場吹捧為女股神嘅劉央,佢都開始轉軚睇淡。喺九月初,牛央(劉央綽號)接受某周刊訪問時,叫人瞌埋眼買股,一年後必然賺大錢,佢自己仲信誓旦旦咁話:「我愈跌愈買。」
但上兩個禮拜牛央接受傳媒訪問時,竟然嚟個一百八十度大轉彎,話大市面臨崩盤,另一波金融海嘯正衝擊本港,破壞力隨時大過○八年,佢更預期恒指會跌破萬五點。