未來兩年樓價 有跌冇升
剛公布嘅中原樓價指數出現下調,雖然只係跌咗一個百分點多啲,但一言認為香港樓價已經到頂,未來兩年樓價只有調整,再上空間微乎其微,想買樓投資肯定輸多贏少。
早喺今年六月,一言已經話政府係咁推政策,樓市隨時被打殘,依家再睇,就更深信香港樓價兩年內有下跌冇上升。小弟並非危言聳聽,亦非好似啲吹水分析員咁,只係憑感覺而言,事實大家只要攤開數據細心分析,自然會清楚整個樓市前景。
樓市愈嚟愈唔對勁,未來兩年樓價隨時要跌一、兩成。
主宰樓價離不開供求,一言睇到,需求正在萎縮,相反供應將會一直上升,兩年內肯定會見到供需不平衡出現,但就唔係供不應求,而係供過於求。
需求方面,自從舊年政府推出額外印花稅後,炒家全線絕迹。冇咗炒家,只有靠用家支撐,但大家唔好忘記,香港七百幾萬人口,業主百一萬,加上公屋,基本上冇人冇樓住,可以話對居屋需求係冇迫切性,套句大陸說話,就係剛性需求唔強。
香港今日對住屋需求,再唔係八十年代上車心態,嗰時但求有個居所,唔計較房屋大細,最緊要買咗先。依家買樓係要改善生活水平,要求換屋,即係要住大啲,住好啲。但政府今年六月進一步收緊七百到八百萬樓宇按揭,咁即係話連換樓人士都受到影響。