主頁 > 專欄 > Paco巨星飯堂 > 泰喜慶 2011 年 08 月 12 日

黃栢高

黃栢高(Paco)，金牌經理人，叱吒樂壇三十年，炮製無數金曲，捧紅不少歌手。近年涉足電影，《行運超人》、《龍咁威》、《殺破狼》等，皆叫好叫座。最新動作，除於本刊主持《Paco巨星飯堂》，每逢周一更在《頭條日報》主持「名人會」專欄，專訪城中名人、紅星。

泰喜慶

今晚「金牌飯局」嘅嘉賓陣容，大概可以用4個字嚟形容——喜事重重！先有黃浩然呢位人氣高企嘅新手爸爸，再有洪天明、周家蔚一對準新人，加上有份投資今晚飯局地點「泰好運風水美食坊」嘅盧惠光，以及北上神州投資演藝學院嘅吳國敬。人人都喜氣洋洋，配合晒光哥為我哋安排嘅正宗泰國美點，咁我先以酒會友，同一眾嘉賓乾杯慶祝。乾！

我同家蔚、天明、浩然（左至右）齊齊到訪光哥（右一）嘅「泰好運」，品嘗正宗泰菜。

新一頁

數事業家庭兩得意者，一定唔少得黃浩然一份。浩然近期劇接劇，透過TVB劇集入晒屋；喺4月佢又榮升爸爸，有兒Kayden萬事足，揭開人生新一頁。當然，呢位新手爸爸都不忘多謝太太支持。

「太太一向都好支持我，佢從來都唔會阻止我做任何事，我諗就算我話要去內地拍劇半年，佢都唔會有太多怨言。好在大家都係做呢一行，佢會明白呢一行嘅運作，雖然佢依家就全職照顧BB，但有好多嘢佢都會明白。

「講真吖，其實我仲未習慣做爸爸呢一個『角色』，感覺太奇妙嘞！近排啱啱有一個長假放，我就學換片、餵奶，仲帶BB去健康院打針，睇到呢一個個體因為我而生，望住佢嘅感覺真係好難用言語形容。」

光哥（右）講到營商之道，七情上面，浩然（左）專心取經。

我對浩然（右）極為欣賞，畀心機！

哈哈哈！為咗Kayden同太太，我相信浩然會更加努力工作，畢竟入行13年，經歷過事業低潮，浩然對依家擁有嘅知名度，倍加珍惜。「好多人話我太低調，冇乜野心，其實我覺得自己唯一可以做嘅，就係做好自己。喺TVB呢4年我學識咗全情投入，我會以『視帝』為目標，但唔會set一個時間表，限死自己。

「另一方面，我一定會再拍電影，以前唔識把握機會吖嘛，當然，我好希望可以有機會再拍杜生（杜琪峯）嘅電影。」

好！有信心，就係原動力，浩然定下目標，一定有機會達成嘅！乾！

砂煲泰式魚翅（$238），落足兩両幾翅，物超所值！

泰式小食拼盤，佐酒最啱！

泰式燒雞（$188一隻）夠入味！

有默契

講到信心，咁梗係要講吓一對準新人天明同家蔚啦！飯局期間佢哋盡顯默契，而家蔚對天明，就一定係信心爆燈，「你哋唔好睇天明平時咁多嘢講，其實佢對住我好靜o架。不過，我知道佢好多嘢都係plan好晒先同我講，好似結婚都係，佢係會搵晒樓，做好晒所有嘢先求婚，而且佢個人好傳統o架，所以佢就主動要求註咗冊先，再plan其他擺酒嘅嘢。」

家蔚甜絲絲咁細訴自己眼中嘅天明，而準新郎就一邊望實「天明嫂」，一邊同我乾杯，哈哈哈！實在係sweet！

講到好似浩然咁，製作愛情結晶，天明都係交由家蔚發表，「我哋都好鍾意小朋友，不過都好enjoy二人世界嘅生活，所以我哋已經有共識，喺兩年後先會考慮生BB。」

能夠共同建立一個幸福家庭，絕對唔簡單，我祝天明同家蔚白頭到老，由天明做代表，同我乾杯！乾！

「天明嫂」（左）代為發言，而天明（中）就貫徹開心本色，手舞足蹈。

炸蟹棗（$98）香口，又係另一佐酒美點。

泰式明爐魚（$48）用料新鮮。

特色炒魚鰾（$98）係少有嘅菜式，製法惹味，可以一試！

最正宗

我同新手爸爸浩然、一對準新人今晚歎到唔少正宗嘅泰國風味，全靠光哥盧惠光嘅安排，佢同佢嘅生意拍檔對食都相當有要求，連盛載泰式砂鍋翅嘅器皿，都親自搜羅，「除咗對食嘅要求之外，我哋都認為一個好嘅砂鍋先可以keep到翅嘅味道，所以就分別喺中、港、泰搵最啱用嘅器皿，卒之喺大陸搵到最配合到嘅砂鍋，跟住先入貨。」