興趣變生意 蔡加頌 蔡加讚 億萬戰車晒冷
玩具大王蔡志明兒子蔡加讚(Karson)和姪兒蔡加頌(Gary),出名是玩車發燒友,兩年前,他們將興趣變成賺錢生意,聯手買賣二手車,主力賣七人車起家,蔡志明見有錢途,於是大手投資過億元,於九龍城廣場開設「極速汽車」陳列室,並在九龍灣自置維修中心,一於發大來搞。
廿四歲的蔡加讚自小愛車,十六歲生日當天,在美國考獲車牌,多年來擁有林寶堅尼、法拉利、保時捷等多部超級跑車,「最鍾意『林寶』夠型又夠快,有性能又有外觀。」而三十二歲的蔡加頌成家立室後,歸於平淡,「現在買車最緊要實用,唔需要好貴,但要夠空間,七人車最好,可以全家一齊坐。」
蔡加讚和蔡加頌在九龍城廣場的車行陳列室,擁有過百架車,他們直言:「我們多是賣七人車或不過百萬的中上價車,除非好特別的靚車先會擺出來,做生意次次擺賣幾百萬超級名車,不知幾耐至賣得出,不合經濟原則。」
加讚獨愛林寶堅尼
九龍灣維修中心的當眼處,停泊了一架八九年的廿五周年紀念版林寶堅尼,是Karson的最「新」戰利品,在車房九個月「龜速」維修,Karson解釋說:「車房要做生意,有時間至做這架車,會換電油泵、電油罐、再換些零件,大約六萬元,我係老闆都要畀錢,好均真,無得簽單。」
這架林寶古董車購自外國的收藏家,買入價二十萬美金(約一百五十多萬港元),他覺得價錢合理,Karson摸着愛車說:「之前個收藏家不捨得揸,廿二年車只行得三百米,我唔會好似他咁癲,一定會揸,有人覺得我買架爛鐵返來,但我真係好鍾意。」