阮兆祥、李思捷和王祖藍，三個人其實來自不同年代。

祥仔入行最久，八四年已經參加第三屆新秀，當時的李思捷剛隨家人移民加拿大，王祖藍四歲多一點，仲讀緊幼稚園。

李思捷九八年在《喜劇之王》中扮導演入行，祥仔正經歷出唱片失敗的低潮，祖藍準備入讀演藝學院。

王祖藍○三年畢業後入TVB做兒童節目，與兩位前輩正式成為同事。

本來應該風馬牛不相及，三條平行線卻在那一個時刻交接起來，合作無間的搞笑本領，去年以福祿壽形象三劍合璧，在娛樂圈中殺出一條血路。

「我們是三位一體的，互相補位，各有功能！」異口同聲地說，祥仔度橋、祖藍marketing、思捷演出條橋，福祿壽確然密不可分。

其實福祿壽三個人最相似的，就是都在演藝事業中經歷過低潮，靠不屈不撓的信念，才有今日的成功，難怪現在的福祿壽，臉上都只有笑容和歡樂，皆因剛剛完成演唱會，緊接電影又上映，三人忙得連瞓覺都冇時間，相信三數年前，他們獨自發展時，誰也想不到會有這樣的一天。

世事難料，誰又能預知未來？

福有攸歸

人生如戲，新戲《勁抽福祿壽》就是講人如何在逆境中求存。

每個人一生中，都總有最甩碌的事、最谷底的時候，阮兆祥自然也不例外。

「九七年的事了，當時準備出唱片，所有事都已經傾好，因為做電視形象太深入民心，所以決定停晒所有拍劇的工作一年，真係放棄所有原本已經有的事業，所謂洗底鋪好條路。點知一年之間大變頻生，與我接洽的阿頭離職，整間唱片公司都換晒人、變晒陣，出碟無望。但又好得意，轉頭TVB就搵番我拍《娛樂插班生》，返電視台做，人生就不過是走了一個圈。人是這樣的了，不會永遠都順利，只要自己不要被拉下去，應付到、過得到就一定有下一個機會。」祥仔說。

福祿壽電影《勁抽福祿壽》就是以三位年輕人如何奮鬥，為的是要搵五十萬做首期。

兩個拍檔中同王祖藍似乎比較friend，連雙方家人都變成好友。

「他（祖藍）是一個很貼心的好人，有些細微細眼的事，只要講過一次佢就會記得。最記得有次問佢飲乜涼茶好，點知第二日佢媽媽就已經煲埋我嗰份。依家我媽媽同祖藍媽媽已經成為好朋友，我媽媽屋企裝修都係同祖藍媽媽一齊去揀材料，佢仲介紹個好好的裝修師傅給我。」

對於李思捷，入行最久的他亦是讚不絕口。

「思捷在演藝事業上，其實下了很多苦功，只係外人真係唔知，佢自己又唔多出聲，思捷真係一個好厲害的男藝人。成功絕對不是僥倖。每次模仿不同對象，都會落足心機去研究，好細微的小動作、表情或者語氣，都可以捉得到，周身刀張張利就係李思捷。」

祿祿無窮

王祖藍是三人中最後生的一位，經歷卻也不比其餘兩人順暢多少，幸好成名得早，真正捱的時間也較少。

「剛剛離開兒童組，去戲劇組的一年是最最低潮的時候，當時冇人識，有一年多的時間都是做一些冇人見到的角色，好像是餐廳中的侍應之類。當時其實好難過，今日唔知聽日事，最後適應到，條路行行吓就掂。後來因為藝人之家的教友知道我是演藝畢業，竟然叫我去教同期藝人做戲，那一段時間的新人都是紅得比較快的，其中一個是陳法拉，我好緊張但亦好開心，既然有人畀機會我就做好佢，慢慢就開始走出谷底。」祖藍回憶起那段做侍應的日子，都會在休息時和其他人扮鬼扮馬玩樂一番，想不到亦成為今日扮嘢演出的一種訓練。

三人拍檔差不多兩年，除了工作上的趣事外，私下已成最佳好友，祖藍甚至說出了一件李思捷的「幫阿媽買消夜」搞笑事件。

「試過開工到夜晚食消夜，你知食消夜就梗係順手開會度埋橋，思捷好明顯就好想走，近乎係個口一路講緊，對腳就向住門口行過去咁，勁歸心似箭，問佢做乜咁趕，竟然話係要幫阿媽買消夜，但係當時已經凌晨兩點幾，更兼係買三文魚腩壽司，全場十幾人個個都知佢係趕住去會女友啦！我就問『auntie咁夜仲未瞓？買消夜係畀媽咪定honey呀？』次次我諗番起都笑到收唔到聲。」

祖藍還爆料說，思捷Honey每次打電話來都係特別鈴聲，真係唔慌冇人知！

思捷即時帶點尷尬地回應：「所有靚女來電都係特別鈴聲！」

講到祥師兄，祖藍卻以爛gag王來形容。

「任何爛gag到祥師兄口，都可以有更爛的gag，祥師兄面對任何人都可以令佢笑，一個笑話唔得咩？繼續再來個更爛的，務求就係要你笑，真係折服。我只能用『爛中有更爛，中有更』來形容。」

祖藍話口未完，祥仔已經講：「嗱！咪冇大冇細囉！」哈哈哈！

壽比南山

李思捷是福祿壽中說話較少的一個，曾幾何時滿腔熱血，在兩位拍檔面前，卻表現出一種沉靜的智慧。

「識我的人都知道，其實我試過做好多不同的工作，最記得係有一段時間唱歌，但就畀人話我，你唔好唱歌啦！唔得o架你。我其實付出過幾多努力，但係冇人知，我以前參加過唔知幾多個歌唱比賽，次次都輸，就係唔得！扮鬼扮馬又成日畀人鬧話冇個性。試過咁多不同的東西，最後就知道都唔係白行，至少得到的經驗原來今日係有用，我始終相信有夢想，不要放棄，終有一日會得到，雖然結果未必一定如自己所想。」

思捷又帶點幕後軍師的語氣，分析三個人的合作關係。

「祥仔每次都有好多不同的idea，好人急智生，隨口就有橋出，祖藍就會將佢marketing，變成一種可以用到的橋，我就會想好多唔同的情況，what if 再加多少少其他變化啦，又或者改少少啦，最後祖藍又可以再sell出來。」

「思捷內心其實係一個導演，可以想好所有舞台或者鏡頭前會出現的狀況。」祖藍補充，三人更即場表演。

思捷：「做人最緊要開心！哥哥帶你去玩啦！」

祖藍：「有玩唔玩！」

祥仔：「罪大惡極！」

天衣無縫的合作就是如此。

真係福祿壽？

面對三位一代笑匠，最大疑問其實是，到底福、祿、壽邊個打邊個？

「呢個問題電影中有交代喇！戲中就係用阮福祥、王祿藍、李捷壽呢三個名。」

阮兆祥是福、王祖藍是祿、李思捷是壽。

三人合作成功上位，卻也各自有個人發展。

「最好就係福祿壽受歡迎，又可以各自有個人發展，最終目標係成為真正的福祿壽！」祥師兄說。

不是說要成仙得道，而是可以做到陳百祥、譚詠麟和曾志偉這組上一代福祿壽般成功，至於最終結果如何，則非人力所能預知。

「凡事盡了力，結果就交畀神。」祖藍未開口，祥師兄代答，思捷在旁猛點頭。

是的，若人生所有事情都可以按照計劃而行，那麼很多人都不會冇工開，記者不用跑新聞、經紀不用跑數，皆因人人都早就預知未來，把自以為最好的留給自己。

我雖不是基督徒，不過這句「結果交畀神！」仍很中聽。

所以，我反正是信了。

信的是福祿壽那份：「我的字典裏沒有放棄……」的勇氣。

訪問中我聽到這首歌最少七次。