放手讓兒子成長 黎淑賢
九五年亞姐亞軍黎淑賢，跟前夫盧惠光育有兩名兒子，分別是十二歲的Jacky及六歲的Jovan，並與現任丈夫許智政育有一名三歲大的兒子Aston。最近，她更宣布懷孕四個月多，多仔婆即時成為朋友間的生育顧問，爭相查問她的生活習慣，提高懷孕機會。
識得生也要識得湊，黎淑賢曾經也差點兒孕育出標準「港孩」，「我以前對大仔太無微不至喇，佢去小便，我係直情幫佢逗住嗰度o架，仲要廿四小時陪住佢，後來發覺佢竟然冇咗自理能力。」自此，她採用朋友方式跟他們相處，放手讓兒子們自己成長。
黎淑賢與前夫所生的大仔Jacky（右一）、二仔Jovan（右二），以及現任丈夫所生的幼子Aston無分你我，打成一片。
小便都幫
黎淑賢於○六年離婚後，表面上離開了以前的家，實際上卻從未離開過大仔和二仔，「當時，我依然日日同佢哋返學放學，晚晚煮飯畀佢哋食，剩係唔喺嗰度瞓覺之嘛。」三仔Aston出生後，黎淑賢也有跟大仔Jacky及二仔Jovan說明，弟弟跟他們一樣都是媽媽的孩子，要相親相愛，「每個星期五、六、日，大仔二仔都會嚟我屋企瞓，三個細路喺埋一齊，間屋就好嘈。有時會夾埋一齊攻擊我，有時會內訌打交，我已經放鬆咗好多，叫自己唔好咁緊張，唔好鬧佢哋、打佢哋，因為我以前打過大仔，後來發現大仔只會記得我打過佢，用咩嘢嚟打佢，但唔會記得因咩事打佢。」
懷孕四個月的黎淑賢，與三個仔到新加坡旅行前，已於半個月前偕丈夫許智政到當地探路，兼享受二人世界。
黎淑賢坦言，生第一個孩子時沒有經驗，不懂得怎樣教導他，只是隨時隨地陪伴着他，「我對佢太無微不至喇，佢去小便，我係直情幫佢逗住嗰度o架，仲要廿四小時陪住佢，後來發覺佢係冇咗自理能力。」至於二仔Jovan，一歲時便遇上父母離異，反而最為獨立，「佢夜晚食完飯識得自己閂電視，攞功課出嚟做。」
近幾年，黎淑賢學懂放手，她明白到，過分的關懷只會妨礙兒子成長，「好似佢唔記得帶書咁，唔記得一次兩次，第三次就會記得，我盡量以朋友方式同佢哋相處，就算佢哋做錯事，我都唔會鬧，慢慢聽佢哋講，然後再一齊討論錯喺邊度！」現在，大仔和二仔事無大小均會致電母親分享，「我記得大仔有次同我講：『今日個阿Sir唔記得拉拉鏈』，如果係其他媽咪，係會叫個仔唔應該講呢啲嘢，但我係問佢：『咁佢着乜嘢色底褲？』」
