煲呔「追飛」落注 唐唐勝券在握
近日政商友好飲茶灌水，最熱話題仍然係特首賽形勢，人人都話有「內幕消息」，口水噴噴預測「雙英一范」邊個最大機會勝出。小弟向來好少插嘴，反而冷眼旁觀「目及」實種種微妙變化，從最近幾個重要迹象睇嚟，唐唐初選勝算大增，已成為超級熱門，其他參賽馬好難追得上。
特首跑馬仔分兩個階段，首先係初選，主要睇「阿爺」搵邊個入閘，選定之後，其他參賽馬就要出局；跟住由選委會進行正式選舉，入閘隻馬就同泛民代表（如果有嘅話）較量，到呢個階段，可以話贏梗。
唐唐去咗挪威坐郵輪，顯示「面試」已過關，成竹在胸。煲呔上周「落飛」撐佢，同時批評振英哥，反映誰勝誰負已漸明朗。
最近初賽已轉入直路，喺呢個緊張時刻，唐唐去咗挪威坐郵輪放大假，此事大有玄機，就係佢已完成「面試」，成竹在胸，知道勝算好大，所以安心放吓假。試問如果「阿爺」仲要再評審，忽然急召佢上京再interview，佢竟然身在北歐，咁咪失晒分？聞說唐唐之前已曾數度北上，講述未來施政，睇嚟已經過咗關。唐唐放埋今次假，返港後就要準備明年三月嘅正式選舉，競選活動起碼要搞幾個月。
另一更重要迹象，係早前煲呔在立法會答問大會上，指唐唐言論同佢一致，有人講嘢評彈施政只係「為咗建立政治形象，即俗話『抽水』」，明眼人一聽就知佢係針對振英哥。聞說煲呔對振英哥不斷批評政府政策早已唔多高興，認為行政會議召集人係建制一部分，既然有份決策，就應企喺同一邊，如果為咗競選要說長話短，應該先辭去行會份職。可能煲呔早前未睇清楚特首賽形勢，唔想影響日後關係，所以忍而不發，如今佢不點名指振英哥抽水，係咪已經知道唐唐勝券在握，振英哥已冇乜機會？
煲呔在前一階段，仍希望「真兄弟」鬍鬚曾有機會入閘，一直靜待形勢轉變，但今次佢撐唐唐而批振英，似乎已摸清楚邊隻馬有機，所以「落飛」畀唐唐。去慣馬場嘅朋友都知，大戶往往在截飛前至落注，一定好有把握，唔想散戶跟住買影響賠率。由此觀之，煲呔於此時落飛，應該睇得好準。
振英哥近日頻頻公開活動，繼續一搏，但要扭轉賽果並唔容易。
至於另一參賽馬范太，最近態度亦有微妙轉變，睇嚟似「退」而非「進」。佢老人家幾個月前忽然殺出，搞到個局更加混亂，當時已有圈中人分析，佢可能知道「阿爺」未揸定主意，形勢分分鐘有變，故報咗名先，最後可能有機會「執死雞」，但佢亦故意含含糊糊，次次都話「諗兩個月先決定」，目的係可進可退，一見「阿爺」有決定，自己有條後路走。近日佢回應傳媒詢問，話自己「連熱身都未到」，亦冇再提兩個月後決定一事（已經過咗兩個月），加上佢私下講起唐唐時，比之前更加正面，有意無意彈吓振英哥，可能佢已測到風向，如無新發展，就唔覺唔覺退賽。
雖然形勢已漸趨明朗，但振英哥仍然奮力出戰，連日來頻頻搞公開活動，仲帶同太太仔女一齊出席，營造美滿家庭嘅溫馨氣氛，稍後又會上巴士電視頻道Roadshow同張堅庭主持十集時事評論（見上期「政官莊」），睇嚟佢老哥仍繼續堅持到底，希望令「阿爺」有新諗法，而且佢相信政治如天氣，瞬息萬變，未到最後衝線，仍可以一搏。
呢個態度好符合佢性格，不過初賽已經入直路，就嚟過終點，唐唐似乎已穩操勝券，振英哥雖然有鬥志，但好難扭轉賽果。
