Baby Lala跳槽 與毛孟靜不和
近排社民連內部散散哋，紅小兵流失唔少，大佬見咁情況，四圍搵新血補充，最近就由公民黨挖走暱稱Baby Lala嘅美少女，如果日後成功將佢捧紅，可以成為吸引新黨員嘅人辦。
呢位九十後靚女全名叫林詠妍，畢業於教育學院幼兒教育系，做過幼院教師，但對政治好發燒，曾經幫過陳太，過檔前係公民黨九龍西支部人員，做嘢都幾落力。知情人士指，佢跳槽社民連，主要因為唔滿意公民黨九西阿姐毛孟靜太霸道，雙方有過頂撞。
原來佢一直想參加九西區議會選舉，但毛姑話佢太young未夠秤，唔畀佢上位，一次開會佢忍唔住反擊，直指毛姑年紀夠大啦，又唔係次次都輸？激到毛姑紮紮跳。佢自知留低都冇運行，於是憤而劈炮。
Lala在facebook嘅cute樣造型照。
睇佢在網上嘅自我介紹，理想職業係政治人物，愛情觀係「愛情好似零食，有會開心，但唔係必需」，最近閱讀書籍為《公民抗命》，睇嚟都幾戰鬥格！
講開社民連，主席陶君行早前跳過程序，請咗周澄做受薪研究員，內部已有閒言閒語，最近高登「巴打」周諾恒又獲聘做區議員助理，兩人都冇入黨，但本身都有號召力，有人擔心日後社民連反而被佢哋利用。
線人指，七一遊行當日，周諾恒就自己舉旗帶一批兵馬攻佔干諾道中，阿陶指揮唔到班o靚，搞到好被動。將來如果佢坐大，分分鐘搞到失晒控，都幾大鑊。
