我送了我的第一次給傅穎。甚麼第一次？她是我負責人物專訪多年來，第一次訪問第二次的藝人，兩次相隔一年零九個月。一直以來，她身上總有很多事。

「戴夢夢男朋友陳定邦係玄學人，佢同我講過，佢同我算過，話我好是非命，就算喺屋企坐低唔郁都會有好多是非飛過嚟。」

「我係要調節自己心理唔好去理啲負面報道。我真係好想講，我唔係為咗宣傳而去造一啲咁嘅新聞嘅人嚟。冇一個藝人會想自己夾嘅新聞，或者自己想造嘅新聞，出到嚟對自己會有負面影響，咁我造嚟做乜嘢？

「好多人有個錯覺我勁厚粉，其實我想講唔係o架！ 我出騷做嘢影相一定會厚粉啲o架，我平時出街都唔會化妝。」

今次見她，老是假設她答問題前會思前想後，又會邊答邊想，期望不高。這位可以拿娛樂圈十年長期服務獎的廿七歲女孩，還是那頭淺金髮、大眼仔、假眼睫毛、苗條，誰知說話卻比上次乾淨利落，我以為這不是我認識的傅穎。

「我自己嘅宗旨好堅定，我講嘅嘢就係真嘅，我講出嚟嘅，我可以咁肯定咁講嘅，就係講緊真說話！」

傅穎的新書《A Time To Love》內，有關她閨房的篇幅屬少數，不過會讓人碌大雙眼來看。

不是第一本書

一年一次的書展，她不是第一次出書，在今年情人節人生第一次到訪汶萊時，想到第一次推出日本時裝雜誌式圖書。甚麼都一手一腳包辦，比之前推出繪本散文集，多花了兩倍時間。

「因為太雜太亂，啲嘢唔係當事人係唔會知道，所有嘢要跟足晒。」

礙於版位有限，她不少收藏不幸被宰割。「我屋企嘅公仔全部都落唔到，過百對高踭鞋、我個衣帽間、有一支支柱戙晒喺度全部都落唔到！」

衣帽間壯烈犧牲，滿載「爸爸媽媽」的小抽屜卻能逃出生天。

「其實係一啲交流嘅嘢，唔係好大part，只不過其中喺bedroom有一part講睡衣。我就唔明點解啲人諗到咁大件事！你平時睇雜誌都show咗啲內衣出嚟，你唔會覺得好尷尬o架嘛，嗰啲內衣唔係好殘好舊黃晒嗰啲，係靚嗰啲嚟，我又幾驚訝大家有咁嘅諗法囉，我冇着上身o架！，呢一套我試過嘅、佢有啲乜嘢『分唇』，呢啲女仔都好想知o架！」

相信她心裏也有數，即使不是女仔，也想知。

傅穎和娜姐穿泳衣打排球固然好看，而片中兩人超慢動作硬食波餅面皮晃動之畫面，亦甚有後現代藝術感，特別推介。

不是第一齣戲

《熱浪球愛戰》，當然不是她第一次演的電影，但遇上第一次合作的娜姐，還有波濤洶湧的後浪。

「每一次上電影，一係就傳緋聞，一係就傳是非，實係o架啦！同其他演員比較嘅，我預咗啲記者會咁做，我都幾冇乜所謂，抱住一個幾平常嘅心，行到出嚟，Chrissie或者JC都係身材好正，大家focus已經係：『嘩！你嘅身材唔夠撼呀！』我冇乜所謂，如果我身材咁犀利嘅話，就加入埋佢哋嘅行列，一齊推出嗰啲寫真啦！

「喺我哋個年代，我哋着tube top、tube dress大家已經覺得性感，依家性感嘅標籤係好高，可能要露三分二個胸出嚟，先至真係叫性感喎！成個風氣唔同咗，我哋呢代唔會因為呢一樣嘢突然去番依家嗰代做緊嘅嘢，因為呢個唔係自己。可能依家啲女仔真係諗嘢開放咗，佢哋會着得好少，嗰隻少係可能會走光、見到晒咁滯，佢哋會覺得冇問題，惟有話佢哋係唞暑啦！

「每一年書展大家最留意唔係你出乜嘢文字書，而係睇吓有邊個出啲好爆嘅寫真、好爆嘅宣傳活動，其實已經變到咁樣！」

當藝人的，有新聞好過沒有新聞；有緋聞好過沒有緋聞，傳你鍾意男仔也好過鍾意女仔吧。

不是太圓滑

如她所說，有求就有供，娛樂圈漫天八卦新聞，罪魁禍首到底是讀者還是傳媒，已是雞先還是蛋先的層次。為了曝光，有指她捏造有人打破她香閨玻璃意圖偷窺的新聞。

「我上年都因為呢一件事唔開心咗一段幾長嘅時間，我有個圈外朋友，佢身邊一啲朋友都會問Theresa係咪夾新聞呀，連喺娛樂圈外邊嘅人睇新聞，都會覺得呢啲嘢都可能係夾嘅啫，經過呢件事之後我就上咗一堂，真係唔需要好衝動咁講事實囉。始終自己係一個好心直口快嘅人，我有嗰句講嗰句，我以前同學由細到大，佢哋都覺得我講嘢太真太直，呢個係我優點亦係我缺點，喺朋友間係優點，喺做嘢係缺點，我好容易會成為被攻擊目標。

「幾年前有段時間唔想出街、唔想見人，留喺屋企諗嘢諗到好混亂我就去沖涼，到依家我都會係，我好多嘢諗好煩嘅時候就去沖涼，沖涼嘅時候諗嘢特別清晰o架，得o架你試吓吖下次！ 每一次好嘅諗法都喺我沖涼時候諗到！」

「好多人叫我轉形象，但大家有冇見過肥姐轉形象？我覺得我自己一頭黑色髮，我個樣就會好冷好寸好coolo架，反而我染淺色，個樣會warm啲，friendly啲o架！」

不是恨嫁

真的假不了，真的擇偶條件也是假不了。

「要溝通得到，尤其有內涵好緊要，最好有一技之長傍身，譬如你係揸筆搵食嘅、你寫嘢OK嘅，唔可以一樣專長都冇。要有主見，我喺工作上係一個女強人，但喺感情上我唔係，我做嘢好專注，但做完嘢後就乜都唔理o架。

「要敬而遠之嘅當然係好花弗嗰啲啦，個個女仔都唔鍾意！千祈唔好勁口甜舌滑，好驚嗰啲空口講白話、好唔誠實嘅人！」

言下之意……

「令我好失望嘅男朋友？咁一定有o架喎。我都唔係好想提及以往一啲唔係咁好嘅，當上咗寶貴嘅一課，一啲唔好嘅感情會幫到我將來遇到The One嘅。我每一段感情都希望開花結果，我自己從來都唔係嗰啲會玩玩吓嘅。

「我諗我下次拍拖會公開，依家嘅fans係接受藝人拍拖嘅，一來大家諗法open咗，二來拍拖係一件開心嘅事，三來係畀自己安全感。我阿媽最大嘅心願就係我同我家姐可以快啲嫁，但係我自己唔心急結婚。」

老實說，情情愛愛，很多時也不到自己話事。

區文詩（圖左）是鈴木仁女朋友，鄧麗欣（圖中）是方力申女朋友，傅穎（圖右）……咦？

傅穎（中）媽媽母兼父職，獨力湊大她三姊弟，傅媽媽很愛傅穎，兩歲就有得去海洋公園。

不是負面新聞

訪問尾聲，話題扯到買樓那裏去。

「好耐之前我阿媽已經叫我買樓，但依家太遲喇，我身邊冇乜人係好識投資嗰啲，依家又好貴，我都唔知點買，都唔識！我身邊冇乜人做呢樣嘢、冇明燈，你可唔可以做我明燈呀？」

話說傅穎現在租住的單位，售價約五百五十萬。

「五百幾萬都好甘o架！我冇你咁多錢，你有錢啲！唔知要供幾多年呀！我想問吓我要畀幾多成呀？（搵埋按揭證券公司按盡應該可以按九成畀一成。淨係銀行最多按七成，你畀三成首期。）三成首期都好甘呀！我邊度搵嗰三成首期出嚟呀？」

不少藝人，訪問完成便收口，像Theresa還會跟你閒話家常的實屬少數，（是否社交禮儀也好）她還說打電話找我吃飯。

姑且在這裏先亮起明燈：待美國加息、香港跟隨加息，樓價穩定，成交增加，便是時機。說到尾，最緊要計好條數，自己負擔得來。

吃飯，甚麼時候也奉陪。待你當上業主，成為一單自己製造出來又正面的娛樂新聞時，再請你吃，又有何所謂？橫豎，大家住得近。