玖紙公關 甄子丹上身
點先係一個好嘅財經公關？三言兩語好難講清楚，好似早前玖龍紙業（2689）開特別股東大會，由於上月玖龍被標準普爾撤銷評級後股價暴瀉，但主席張茵一直未有公開出嚟講番兩句話，所以大批傳媒老早撲去大會等張茵。
一睇女公關（右）個戰鬥格，就知佢係打得之人。
話說張茵一出電梯，傳媒自然蜂擁而上，把張茵團團包圍。張茵一向友善，即時停低回應傳媒提問，但唔知係咪護主心切，佢身邊位高頭大馬嘅女子即時甄子丹上身，除大聲喝罵記者外，雙手仲大開大合，左推右撥，將記者一一推開；情況有啲似李小龍喺精武門入面，將成大班日本道場高手打到飛開，搞到在場記者為之側目。
開頭仲以為女甄子丹係張茵個保鑣，後尾有人認得係某財經公關公司員工，佢奮力護主嘅行動已經唔係第一次，以前為某啲公司做嘢時，都係幫老細做開路先鋒，喺採訪期間做人形坦克撞開記者。查實一言好奇怪，公關公司可以安排好啲，畀傳媒跟公司老細傾兩句，再唔係咪客氣要求人哋讓開，唔使搞到又詠春又洪拳，怕且特首真係要搵佢做貼身保鑣。
