小舖王搞免費結婚典禮
舖王鄧成波喺油麻地搞緊間婚禮統籌公司，剛定名為拉斐特，由舖王細仔鄧耀昇打理，成個場佔地過萬呎，依家做緊裝修，但已經有唔少人預訂。
鄧耀昇雖然年紀輕輕，但甚有諗頭，上月有間證婚中心突然結業，成百對準新人唔知點算；鄧耀昇正密鑼緊鼓準備為拉斐特開業，甚有生意頭腦嘅小舖王，見同行摺埋，即時走去跟舖王老竇商量，度橋吸納呢批準新人。
小舖王計劃，為嗰批「苦主」新人提供免費場地行禮，仲包埋打燈同布置；聽聞呢招幾成功，已經有超過四十幾對準新人轉場。小舖王呢招一舉兩得，既可以為新公司吸客，又可以廣收宣傳之效，雖然賺唔到乜錢，但作為新公司，可以打響頭炮已經唔錯喇。
