極品逆子

梅啟明，絕對是一個負面人物。

71歲，一事無成，這十多廿年，他把寶貴的光陰，全程投入於爭奪梅艷芳的遺產。

 

 

他會自讀法律書，然後不斷入稟索償，有時控告醫院要求30億賠償，有時不斷要求法官提高梅媽的每月生活費用，有時向電影公司提出版權訴訟，有時大吵大鬧開招待會。

不過，每一次他都敗訴而回。

「金錢」兩個字，總是在他的人生字典裏，怎撕也撕不掉。

為了錢，他會數臭法官，他會瞓街抗爭，他會不念養育親情，怒轟梅媽媽，又會暗示兒子生重病，急需醫藥費。

這樣的一個人，眾叛親離，梅媽媽形容他是財迷心竅，覺得他無藥可救，無奈之下，跟他斷絕母子關係，從此不相往還。

「我同佢出生入死，佢全部仔女死剩我咋！竟然閂我水喉，我依家刮痧都冇呀！佢話我財迷心竅？我100個不同意！佢先至係，唔係我！」

大馬妻子知道他另有情婦，又借兒子過橋向梅媽扮慘索錢，怒斥他是躝癱。

「我係佢老公，佢要我搵錢返嚟養家，點解仲咁樣話我？都嫁咗我好多年啦，緣份嘅嘢好難講。」

當朋友知道我要獨家直播訪問梅啟明，都勸說我要三思，一來不應該嘥時間聽他講廢話，二來他是一個衰人，即使他早前在廚房慢動作跣親昏迷，大家只關心地板有沒有被撞凹，也對是否呃工傷起疑心。

我還是決意會一會他，視為一個挑戰，看看自己能否在訪問技巧更上層樓？會不會被他帶着遊花園？也想知道一個人如何無恥便是無敵，張開眼能

說連篇歪理？隨便節錄，都可見到他的真面目。

「我個仔屈住屈住唔開心，入咗醫院。」他說。

「會唔會因為你瞞住老婆去滾，個仔傷心呀？」我追問。

「瞞乜嘢啫！冇瞞呀！呢啲係大人嘅事。」他口窒窒承認，沒跟太太離婚，亦另有情婦。

「你啲兄弟姊妹全部都死晒，點解咁多人死，都唔見你死嘅？你覺得上天留住你條命，有乜嘢價值呢？」我代大家問。

「點解我仲未死？因為我捐咗好多年血，救咗幾百人！」他理直氣壯，「我其實都周身病，又冇錢，又咁大年紀，我嘅苦邊個知？」

「你嘅病其實係荷包肝硬化同埋急性發錢寒啊。」我不禁戥100歲的梅媽心痛問：「你覺唔覺得自己不孝，係不肖子？」

「完全唔同意，佢即使到咗101歲，如果坐喺我面前，我都要鬧爆佢，佢寧願啲錢俾人呃晒，我就一毫子都冇得到，邊個可憐我？」他激動拍枱說。

這幾天風暴襲港，可能好快有人俾雷劈！