勞永樂考慮重返社民連 毓民眼中釘紛回朝
政圈人物離離合合，同明星換畫差不多，一句到尾：走位搵機會啫！好似社民連咁，自從毓民拉隊走人之後，當年跟佢有過節而劈炮嘅舊人，已陸續回巢，或積極考慮再加盟，最新消息係：勞永樂醫生有可能重回社民連，部署在港島出選立法會，誓奪一席位。
線人回報，近日每逢社民連晒馬示威，勞醫生都低調現身隊中，有時仲幫手籌款，表面似普通義工，但明眼人就覺得唔尋常，原來社民連的確有人搵過佢密斟，希望佢回巢，明年齊齊搶位，而佢亦心郁郁。
勞永樂醫生（左小圖）當年同毓民反目，憤然退黨，如今毓民已去，有人即搵佢密斟，拉佢回朝，佢亦心郁郁。
有人打電話向佢查詢，勞醫生婉轉回答，承認自己正慎重考慮返去，原因係社民連最近出現人事變動，個黨重上正軌，令佢有新睇法。換言之，因為毓民走咗，好多嘢可以再商量。
線人指，當年勞永樂同丐幫埋堆，原以為可借社民連支旗，在港島搶一個立會議席，但因黨內各派勢力複雜，佢想做副主席又被排擠，自覺好難上位，乃萌劈炮之意，其後有人傳出毓民搵社團好友幫手，平租一個物業做黨址，勞醫生竟公開斥責，連內部資料都爆埋，毓民自然㷫到爆，準備踢佢出黨，佢知道此地不留人，快一步自行退黨走人，自此兩人反目。
勞醫生○八年單打獨鬥在港島出戰，得兩萬幾票，差幾千票就可晉身立會，社民連新領導層覺得佢仲有實力參加明年立會選舉，如果成功，社民連就可以爭得三席（長毛、阿陶及勞醫生），保到個勢。
如果勞醫生返社民連，阿牛即受威脅，可能拉隊退出。
不過，勞醫生若回巢，長期盤踞港島山頭嘅阿牛（曾健成）就冇地企，佢多年來死心不息要入立會，好可能一拍兩散，拉隊自己參選，咁就七國咁亂。
除咗勞醫生，毓民另一「眼中釘」、前秘書長季詩傑，最近亦無聲無息返回社民連，暫時做住「普通會員」，遲啲可能再發圍，同阿陶拍住入領導核心。
季詩傑本來受毓民力捧，但佢老哥同毓民出現路線分歧，兩人矛盾日深，其後毓民更指佢洩漏黨內秘密，又話佢帶陶君行去新花都，最後佢被迫辭任秘書長，仲退埋黨。毓民散水後，阿陶自然冇忘記呢位拍檔，眉來眼去之後，季詩傑就悄悄回巢。
