有請林婆婆

「係咪路呀？係咪路呀？」

林婆婆，請在15秒內講出，有個「路」字的人名。

「唔係路，唔對路，唔啱路，唔正路……」

 

 

錯呀婆婆！係人名呀！好似馬蹄露、瑪麗蓮夢露、羅拔迪尼路、阿古路、彭妮露古絲咁呀！不過時間已經夠了，你一個都答唔中，唔緊要啦！志在參與嘛！

「乜你唔係問我點睇電影金像獎嘅賽果咩？」林婆婆以客家鄉音，理直氣壯繼續答：「跌眼鏡，爆大冷，小圈子……」

林婆婆，請停一停，題目唔係問你感受，呢度唔係城市論壇啊！

「不過我都開心， Edan攞咗影帝。」林婆婆幾乎開心到笑甩副假牙。

Edan只係同時有兩個提名，角逐最佳新演員咋，不過最後輸俾林諾。

「唔係噃，場刊明明寫劉青雲叫Edan Lui！」

劉青雲的英文名，其實叫Sean。Edan Lui係呂爵安， Mirror成員之一。場刊可能冇人校對，又或者編輯是鏡粉，潛意識想Edan有朝一日做到影帝，不過排吓隊啦，遲早「序」有應得。

「咁點解蝦頭會輸俾王菀之吖？佢喺《正義迴廊》喊得咁淒涼，演技明明超晒班。」

 

 

林婆婆，Wyman的人生金句，你可能未聽過：「寧願冇獎，別人戥我唔抵；都唔希望攞咗獎，別人覺得我唔值！」

林婆婆難得有人傾偈，越傾越精神，「其實青雲攞影帝係實至名歸，不過阿卵同阿東都演得好好，我想佢哋是但一個贏，叫做鼓勵下後輩，唔使年年都係提名朝偉、華仔、青雲同秋生啊！」

林婆婆，青雲有安慰佢哋o架：「如果有夢想又肯努力，而且夠長命，夢想有一天會好奇怪又帶着遺憾實現。」

林婆婆繼續搶咪插嘴：「不過嗰套最佳電影，贏唔到影帝、影后、最佳導演同最佳編劇，又一早腰斬落畫，到底憑乜嘢會贏吖？有冇天理？」

總之贏咗先算，頒咗獎先算，過咗海係神仙先算。「係咪路呀？係咪路呀？」林婆婆鬼咁長氣，最後主持人送上菜心、白菜、芥菜、茼蒿菜、菠菜同生菜作為獎品，成功收線。