今時今日，可與「神」對話，是一項壯舉。
「神」，是Anson Lo（盧瀚霆）。
廿七歲的他，IG有一百一十五萬的追蹤者，是MIRROR十二子之首；截至三月三日，其新曲《MONEY》MV於YouTube的觀看次數，已超過三百六十萬，以香港標準計算，是「世一」。
不過，驕人的「神績」，是Anson Lo以健康與汗水換來，以致新曲派台兩天後，他於工作時暈倒，令遍布全球的「神徒」，擔心到不得了。
除了即日於IG上報平安，訪問這天，Anson Lo笑着「覺今是而昨非」。
「健康係慢慢累積嘅，唔健康都係，當日我開工之前，冇食嘢又冇飲水，結果就嚴重脫水。所以，o依家每次開工之前，我都會逼自己食嘢同飲水。
「我啱啱仲做埋Body check，都OK嘅，唔係有太大問題，其實拉筋都好緊要。」
壯舉的定義，不需要拯救宇宙，僅限於閣下揭這八頁時（對，最後兩頁更是跨頁海報！），不需閱讀文字，睇相也不自覺地揚起的「姨母笑」、「大叔笑」或「迷妹笑」，夠壯了嗎？

 

 

 

金不換

新曲名為〈MONEY〉，並非照字面解的意思，Anson Lo坦言，作品具深層意義。
「我想表達嘅，係金錢唔係萬能，歌入面嘅英文Rap，係我自己寫嘅，靈感係嚟自舊年嘅一啲感受，因為當時嘅壓力比較大，就算搵嘅錢比入行前多，但快樂都唔係必然嘅。
「對於我嚟講，親情，同埋Fans對我嘅感情，都唔可以用錢買到；健康、無憂無慮，都係唔可以用錢去衡量。」
即使現在「神徒」給予滿滿的愛，Anson Lo於去年的情緒低潮期，還是選擇了自我療癒，「當時試過好多方法，包括用咗兩個月時間，俾自己冷靜吓，多咗時間獨處，亦都好勤力做Gym、做運動。」
重新投入工作，Anson Lo亦參與作品的創作，DSE中、英文分別考得5*及5佳績的他，寫英文Rap充滿信心，說到填中文歌詞，則還是有些猶豫。
「就算寫Rap，我都會睇多啲英文嘅詩，去提升自己；之前我都試過寫中文歌詞，但後來睇番，我覺得都係差啲啲，Ian就係專才！我諗我要再努力啲。」

今年推出首支跳唱歌曲〈MONEY〉，Anson Lo稱於MV中嘗試不同角色，還特地浮誇地演出。

家人跟愛犬Amber，在他的心目中也是相當重要，「教母」更經常炮製愛心湯水，為他補身。

享受跟隊友Crossover，他稱希望有機會與Tiger於舞台上合作，擦出火花。

27吋

訪問前三天，他於工作時暈倒，自然對身體健康有深刻體會，身高176cm的他，現時只有135磅，腰圍更只得27吋，確實要好好增磅。
「上次開拉闊音樂會之前，我試過增大食量同飲埋奶粉，先增到去145磅。我係瘦底，要逼自己食多啲嘢，一日食少過三餐都會瘦，如果要保持喺140幾磅，就要食五餐。」
跳舞運動量大，雖然令他增磅有難度，但也因為跳舞，令他踏上星途，讓夢想逐步成真。回想昔日放棄大學學位，投身舞蹈界，即使月薪只有一千四百元，他也從未言棄。
「以前教跳舞，我好鍾意喺街度流連，因為堂與堂之間有空檔，我就一個人去睇戲、篤魚蛋、食燒賣，有時又會同啲Friend去唱K，或者飲吓嘢。」
現在已是「教主」的他，坦言成名後的喜好轉變了。「我o依家一有時間，都係留喺屋企，唔係好鍾意出街，同朋友都少咗聯絡，因為我嘅工作時間唔定，所以都見唔到，而我o依家嘅朋友圈，都係同行。」

 

 

二〇年起，他成了各大小頒獎典禮的贏家，包括今年初舉行的《叱咤樂壇流行榜頒獎典禮》，所獲得的大獎「我最喜愛男歌手」。

 

早前他出席公開活動時，不支暈倒，令一眾「神徒」擔心不已，後來他承諾會注意自己的健康。

他跟MIRROR隊友們也是歌、影及廣告商的搶手貨，吸金力特強。

Anson Lo以寵粉著稱，他坦言，「神徒」的地位不可取締。