中大問卷洩密 煲呔誓要追究

中央政策組搵中大傳播研究中心做民調，問市民是否認為鬍鬚曾要下台，呢個調查只供內部參考，但有人將問卷洩漏，傳媒收到料大字標題報道，仲繪影繪聲話政府想郁鬍鬚曾。

知情人士同小弟講兩樣嘢：第一，單嘢係中大負責民調嘅人士漏出，可能只係口疏，跟中央政策組內部矛盾無關（有人揣測係組內「親中派」所為），更非政府放出訊息。由於中策組同中大有保密協議，此事爆出後，煲呔㷫到爆，下令向中大追究到底。

第二，煲呔對中策組搞呢個民調甚感不滿，認為份問卷冇必要咁問，應該諗到有人會漏出街。煲呔本來已同中策組阿頭佳叔唔多啱key，冇乜聽佢意見，早排佳叔鬧出「臨界點」風波，馬後炮指民怨沸騰，加上今鋪又洩漏問卷，兩人關係勢必更差，在未來一年幾，佳叔張冷板櫈將愈坐愈凍。