唐唐拒飯局 新策略鬥泛民 煲呔(渣)旗大反攻
世事無常，政治形勢亦一樣，早前鬍鬚曾派錢行錯棋，被攻到陣腳大亂，泛民班友棒打落水狗，繼續追擊想贏到盡，但貪勝不知輸，連政府臨時撥款都打沉，公務員同阿公阿婆可能斷糧，搞到「媽」聲四起。政府見到轉勢迹象，立即部署反攻，並重定一套新政治策略，希望收復失地。
線人回報，政府高層已一致夾好，既然泛民話「宣戰」，就同佢哋分清敵我，短期內唔出席友好聯誼，唔就「不合理要求」對話，唔再和稀泥討泛民歡喜，全面回歸建制派嗰邊，建立更緊密政治聯盟。
線人舉咗個例子，唐唐本來約咗泛民開飯局，出席嘅仲有林瑞麟、邱騰華、李少光、梁卓偉以及特首辦參謀劉細良等，但政府高層早兩日決定取消飯局，交誼告吹。其他司局長亦停止類似交流，劃清界線。
泛民見完鬍鬚曾後，正式向政府宣戰。煲呔（右圖）趁泛民撻Q，罕見地予以炮轟，開始反守為攻。
司局長與泛民「斷交」
線人話政府高層咁做有兩個原因：過往有司局長simple兼naive，以為徵詢吓泛民班友，順吓佢哋意，對方就會手下留情，誰知班友彩就攞咗，到通過政策時就反轉豬肚，踩到你盡，早前交通津貼已賴咗嘢，到鬍鬚曾起草預算案，吸納咗班友唔少意見，但派錢出錯後，佢哋就反面狂插。經過呢幾次慘痛教訓，班官不會再表錯七日情。
除此之外，高官過往以為討泛民歡心可以過關，反而冷落咗建制派，上次「交津」單嘢，張建宗事前冇同建制派傾掂，最後差啲撻Q，佢哋要臨急救亡，已㷫過辣雞，今次鬍鬚曾又係咁，到後來群情洶湧，連建制派都話反對，至匆匆轉彎。經此兩役，政府高層大徹大悟，知道「吃兩邊」只會兩面不是人，以後策略上應同建制派企埋一齊，唔係出咗事攬住一齊死，咁至可以保住支持票。
唐唐同幾個局長本來約咗泛民開飯局，最近決定取消。
鬍鬚曾及其團隊欠缺政治謀略，今次搞到一鑊粥，高層痛定思痛，知道打呢場仗要講政治策略，所以作戰指揮部已轉回特首辦，由煲呔親自統籌，例如早前鬍鬚曾會見建制派議員，決定全民派錢，當時大內總管譚志源都有出席，之後有關預算之戰嘅對策，都由特首辦主導。
及至泛民議員玩大咗否決臨時撥款，公眾反彈極大，班友撻Q，政府錯有錯着，特首辦「心戰室」立即啟動，煲呔、鬍鬚曾同陳家強都企出嚟怒斥泛民不負責任，亦有文章指班友只顧政治得分，不理大眾利益，令泛民急忙招架，由攻變守。
炮轟「反對派錢」
線人話，泛民提出三大要求，政府亦冇可能讓步，因為設立退休保障基金涉及極複雜制度，有排討論，當年成立強積金都傾咗十年八年啦，要政府倉促扑槌，係強人所難，公眾亦好難同意。至於復建居屋，乃是整體房屋政策問題，唔係財爺可以決定。要求開支多二百億，係咪取代派錢呢？如果係，泛民都會被市民鬧到暈啦！政府諗過，就算唔答應三大要求，公眾未必好反感。
反而政府會全力攻擊泛民反對派六千蚊，如果佢哋唔表態支持派錢，分分鐘成為人民公敵，會輸得好勁！
泛民準備打到「七．一」
至於泛民個邊，內部已決定食住個勢去到盡，由三月至五月連環出擊，唔畀個party完。頭炮係在立法會提不信任財爺動議，即使過唔到，都大削政府管治威信；到四月十日，就發動一次反預算大遊行，為此已book咗維園三個足球場，預定主題係「要求曾俊華下台」，為稍後立法會辯論預算案造勢；高潮係四月十三日預算案表決，到時將搞一場大龍鳳，令反政府行動升溫。
泛民呢個安排，背後另有盤算，就係將反預算行動延續到五月，屆時距「六四」及「七一大遊行」已好近，只要保持住聲勢，就可以在七．一搞場大騷，實行打跛政府隻腳，成為真正嘅跛腳鴨。如果一切順利，到十一月區議會選舉之時，泛民便氣勢如虹，攻城掠地，大勝一仗。
不過呢個算盤睇嚟冇咁容易打響，因為政府吃咗大虧之後，明顯已變陣，打法將「精」好多，唔再輕易被偷襲攻破，反而會有神來之筆，令泛民佔不到便宜，說不定一不留神陰溝翻船。
泛民部署將反預算遊行延續至七．一，谷出一場大騷。
鬍鬚曾唔會落台
有人問：鬍鬚曾今次孭咗鑊，會唔會落台？知情人士斬釘截鐵話「唔會」，因為佢只係犯技術錯誤，冇涉及個人操守，亦冇直接損害公眾，錯不至於下台，如果畀泛民噓吓就辭職，以後司局長咪排住隊等殺頭？所以條線一定要守住，要考慮政治後果。
佢話，鬍鬚曾去留唔係個人問題，關乎成個政府，佢做嘢向來硬朗，冇咁易跪低，煲呔亦一定唔畀佢走，講到阿爺，當然更唔會容許咁做啦！
泛民提不信任動議，要拉鬍鬚曾落台，睇嚟唔會罷休，但咁做只係想挫佢威望，同時逼建制派護航。除非鬍鬚曾自己請辭，泛民一定唔夠票，不信任動議冇可能過關。
