講得係奇遇，自然係千載難逢嗰隻。
睇到隔籬張Poster，你都知係講緊Netflix韓劇《非常律師禹英禑（音吳）》，冇錯！係近排Netflix劇集No.1常客，你點會唔識呀？
除咗Netflix，劇集喺韓國本土，收視由第一集0.948%，爆升到上周第八集嘅13.093%，仲唔夠奇？
仲有仲有！導演堅持等女主角朴恩斌一年，先Roll機開拍呢個關於自閉症律師嘅故事，而朴恩斌有Heart有深度嘅演繹，加上極Warm嘅故事，卒之就令劇集大Hit，成為收to the視to the王。
唔明？咁要開始煲劇嘞！

九月先三十歲嘅朴恩斌，四歲就以模特兒身份入行，再由童星開始演藝生涯，為咗演戲分析角色，佢大學特別選修心理學；為咗《禹英禑》，佢就先搵醫生了解自閉症人士心境，再剪個齊蔭Bob頭，內外都咁有Heart。

劇集講述由朴恩斌飾演、患有自閉症嘅禹英禑，進入「汪洋律師行」後嘅故事，於六月尾首播，本土收視持續上升外，喺Netflix嘅收看率又橫掃韓、日、港、台，熱過近排嘅天氣。

細台響朵

知你係大忙人，未煲《禹英禑》，俾個Outline你留個底，劇集講述禹英禑係一個IQ高達162嘅自閉症律師，故事除咗關於佢嘅特殊身份，仲涉及社會問題⋯⋯好deep？其實貼地咁帶出大道理先真，所以收視同受歡迎程度，都好似坐咗火箭咁飆升。
不過，女主角朴恩斌唔係宋慧喬、全智賢嗰隻，其他卡士亦只係實力派，加埋故事冷門，所以即使原本安排喺韓國三大電視台之一嘅SBS播出，都被彈鐘，ENA先冷手執個熱煎堆，卒之仲省靚埋個招牌，好心有好報。
劇集籌備兩年（有一年係等朴恩斌有期演出），喺七月中煞科，導演劉仁植對於作品大Hit，驚喜萬分。「觀眾對我哋準備嘅樸素故事，產生咁大嘅共鳴，我好感謝。」
樸素嘅故事，製作費一啲都唔樸素，有成200億韓圜（約港幣1.2億），同宋仲基孭飛嘅《黑道律師文森佐》睇齊，用嚟搭場景、電腦特技，全部都用得其所。

 

今日有一致俾like嘅禹英禑，全因劇集導演劉仁植嘅堅持，等待當時正同路雲拍攝古裝劇《戀慕》嘅朴恩斌。

劇集大熱，女主角朴恩斌人氣急升，廣告接唔停外，兩位男丁：飾演上司嘅姜其永（上圖）同暖男助理姜泰伍（左圖），都相當吸Like，後者嘅IG follower人數，仲由劇集初期嘅32萬，升至上周嘅106萬。