蕭公子踩晒界 強姦案受害人呼之欲出
涉嫌強姦非禮被捕嘅任亮憲，下月初再返警署報到。上周中，同毓民份屬友好的蕭若元，在其網上電台節目中，突然播出一名女子早前於港台節目《城市論壇》嘅發言聲帶，更稱之為「城市阿嫂」，其他網友紛紛留言回應，暗示該女子就係任亮憲強姦案受害人A小姐。
片段長約三十秒，當播放後，蕭公子詢問另外兩名主持人：「你覺得佢（女事主）靚唔靚呀？」然後一名女主持人話：「好靚呀！」另一名男主持則回應：「麻麻哋咋喎！」
及後，蕭公子問是否有網民查詢該女子身份，然後話：「最簡單四個字，呢個叫『城市阿嫂』，哈哈哈！」佢跟住講：「這女仔幾聰明，想搵佢嚟做節目……如果佢有聽節目，可以聯絡我們哋……做《波政不分》，或者《五個一夜情》。」
節目結束後，有網民在《香港人網》討論區內再度轉載女事主於城市論壇發言的片段，更引述其中英文姓名。
有法律界人士指，蕭公子咁做好踩線，因為根據法例，任何人都唔可以暴露強姦案受害人嘅身份，而且透露受害人資料，亦可能妨礙司法公正，分分鐘賴嘢。可能蕭公子想幫吓任亮憲，最怕幫佢變成害佢，仲害埋自己！
蕭若元同毓民老友鬼鬼，自然力撐佢隻頭馬任亮憲。
林健鋒好運到爆 玩輪盤嚇呆大陸客
「經濟動力」林健鋒新春去新加坡度歲，湊熱鬧入金沙度假村賭場細細注玩吓，佢向來有賭運，今次更加好運到爆燈。
當日佢先去玩輪盤，鋪鋪都淨係落注買八號，有個大陸客走過去同佢講，賭錢唔係咁賭o架，應該分散買多幾個冧把，你咁玩法實輸梗啦！林健鋒見對方扮晒專家，一直冇睬佢，玩咗幾鋪之後，果然碌正八號，一賠三十六，大陸客睇到眼都凸埋，林健鋒就騎騎笑攞籌碼走人。
跟住玩廿一點，佢老哥真係犀利，玩八鋪都贏，大勝而回，雖然注碼好細，但都十分和味。佢同老友講，入賭場切忌磨爛蓆，一有斬獲即刻走人，否則必然輸凸。
林健鋒買馬亦甚好運，聞說佢落注唔係睇馬經貼士，而係憑第六感買顏色，例如呢個禮拜旺紅色，佢就落注於紅衫騎師。佢用呢個方法贏過唔少，真係信不信由你！
