打官司彈藥買少見少 哨牙通撤換律師
已故華懋集團主席龔如心的千億遺產爭奪案，第二回合暫且告終，「老公豬」陳振聰再度敗陣，被上訴庭法官狠批不誠實及濫用司法程序，遭判懲罰性訟費，但「哨牙通」一於少理，堅持打到上終審法院，盡地一煲。
連敗兩陣，單係訟費都分分鐘要磅水三億，同時又被稅局追稅，估計「哨牙通」要急籌七億解困，最慘係佢間上市公司股價插水，滾水淥豬腸兩頭縮，打官司彈藥買少見少。佢老哥近日撤換律師樓，搵咗侯劉李楊律師行合夥人之一楊偉雄代表佢。呢間本地律師樓九二年成立，主力做房地產買賣，講到打爭產官司，似乎唔及「哨牙通」以前用開嗰間咁巴閉。
「哨牙通」一直用開星級嘅何敦麥至理鮑富律師行，開戰之初已經由有「法律界李察基爾」之稱嘅律師麥至理做代表，開記招派發佢同龔如心的合照。
何敦麥至理鮑富律師行擅打刑事案，客戶不乏名人富豪，收費自然亦是明星級，曾代表被控串謀訛騙的聯合集團前主席李明治抗辯，該案糾纏十多年，耗逾億元公帑；○八年又為前港大醫學院院長林兆鑫的欺詐案答辯。
麥至理係該行合夥人之一，○五年曾代表龔如心就遺囑案上訴至終審法院，並贏得終極勝利，令王德輝遺產全歸龔所有。
陳振聰打這場遺產官司已用了大量彈藥，分分鐘要付三億訟費，加上佢財富日縮，都幾頭痕。佢最近轉聘一間本地律師樓（左圖），唔再幫襯之前嘅星級律師行。
