主頁 > 專欄 > Paco巨星飯堂 > 嘗和味 2011 年 02 月 22 日

黃栢高

黃栢高(Paco)，金牌經理人，叱吒樂壇三十年，炮製無數金曲，捧紅不少歌手。近年涉足電影，《行運超人》、《龍咁威》、《殺破狼》等，皆叫好叫座。最新動作，除於本刊主持《Paco巨星飯堂》，每逢周一更在《頭條日報》主持「名人會」專欄，專訪城中名人、紅星。

嘗和味

香港人極愛和風美食，所以日本料理開到成行成市，今次我就要帶你哋先以肉眼品嘗高品質和食，去「竹壽司」歎令人一試難忘嘅Omakase（廚師發辦）。

至於我挑選呢度為「金牌飯局」地點嘅原因？只有一個——嘉賓，張寶華（Sharon）同陳沛嘉（Balia）兩位美女，一位最愛和食，一位極多相識，喺Balia嘅推介下，我哋今晚齊齊「嘗和味」。

我變身大師傅，以最新鮮壽司招呼今晚兩位美女嘉賓Balia（中）及Sharon（右）。

「竹壽司」嘅日本師傅君島友紀雄Kimijima San（左），係東京「壽司幸」派來港嘅大師傅，即席幫我變裝。

極上品

因為Balia知道好友Sharon最愛日本菜，所以佢大力向我推介「竹壽司」，「我好為食o架，最鍾意成日周圍搵啲好嘢食，咁啱我之前試過呢度嘅Omakase，真係好好食，所以知道可以同Sharon一齊做Paco你嘅飯局嘉賓，我第一時間就諗起呢度。」

哈哈哈！我對日本料理嘅要求好高o架，而且仲同Sharon嘅要求，不謀而合。「我對日本料理情有獨鍾，除咗因為日本人對菜式所花嘅心思之外，仲同魚有好大嘅關係，刺身、壽司多數都係用魚炮製，而我就好鍾意食魚，加上日本料理係重質不重量，咁份量就一定唔會過多啦！

「不過，所有材料就一定要新鮮，如果刺身唔新鮮，又點會好食呢？」

冇錯，我成日都話經營日本料理，最可以顯出權威之處嘅，就係餐廳老闆肯唔肯放棄每日用賸嘅材料。魚生一隔夜，一定唔新鮮，但日日清嘅做法會提高成本，所以真係一分錢一分貨。

「竹壽司」嘅Omakase（廚師發辦）套餐，晚裝每set $1,000，當中包括刺身拼盤（圖左）同壽司拼盤（圖右），最大賣點係材料日日新鮮，而且同東京同步。

兩位靚女同樣對日本料理相當喜愛，Balia仲大力推介「竹壽司」，自然要合照留念啦！

Sharon（左）同Balia（中）即刻為我留影，佢哋仲大讚我呢個大師傅造型特別。

真典範

而「竹壽司」就係當中嘅樣板，餐廳同喺日本有悠久歷史、獲米芝蓮一星嘅「壽司幸」第4代傳人杉山衛合作，將銀座美食與香港同步，日日喺築地空運材料到港。3位香港老闆梁志天（Steve）、關永權（Tino）同郭志波（Paul），各為專業人士，佢哋嘅共同目標係「4D Dining」（Dedication、Delicious、Design同Details），呢個理念喺我試首口野生吞拿魚腩嘅時候，充分表現。

Sharon對呢份美味toro嘅感覺，演繹得更加仔細，「唔……好rich呀件toro，比平時食到嘅飼養吞拿魚，野生嘅肉質更加有彈性，好好味。」