最近大半年，不少名人都因疫情而停工，人人都趁有空檔去學煮食、學繪畫，亦有人迷上陶藝，無論是重拾故技或是初學者，作品水準都甚高，小小的陶藝品，潛藏無窮藝術養分，娛圈人果然是才藝兼備！

梁詠琪耐性訓練

近日於社交平台上，不時見到梁詠琪貼上參加水墨畫、陶瓷、甜品班的照片，當中不少陶藝作品還很有水準，不似是初學者，原來Gigi早於中學時期已有接觸陶藝。
「讀書時有玩過，不過無深入鑽研。大概喺十五年前正式學，嗰陣時喺工餘時間去報名上堂，不過實在太忙，無辦法持續進修，直至今年因疫情停工，先有多啲時間。o依家一星期上兩堂，整陶瓷最重要係練習，熟習接觸泥嘅觸感，唔練習一定會生疏。」
已為人母的Gigi又稱，跟照顧子女一樣，整陶瓷同樣需要考耐性。「每嚿泥都有佢嘅特性，天氣濕度、泥嘅乾濕度、軟硬程度都唔同，要好有耐性咁，去等到一個適合嘅狀態，先去下一個步驟，唔可以心急o架！」現時每完成一件陶器，她都會在作品上簽名，並寫低完成日期，以防日後會遺忘它們，「係自己親手造出嚟嘅，唔記得咗幾時造，會覺得好對佢哋唔住咁！」

梁詠琪表示，現時她整陶泥完全無壓力，只是用以陶冶性情。

素色或是隨意掃上黑泥、彩釉，都是Gigi喜歡的創作。

黃智雯心靈療癒

舞技了得的黃智雯，對陶藝亦有興趣，最近她就報讀了相關課程，更將整陶瓷碗短片Po上網，見她穿上圍裙、聚精會神將陶瓷造形，每個細節都一絲不苟，她坦言，很享受製作過程。
「過程好療癒，係另類嘅心靈治療，因為可以將100%嘅注意力，放喺泥土上面，過程其實冇框框教你點做，好單純咁同泥土溝通，隨着個Flow、自己嘅感覺一路變化，我好鍾意呢種隨性嘅感覺。」

 

黃智雯整陶瓷時非常投入，女生專注的樣子也非常Charm呢！